भाजपला शिक्षक उमेदवार मिळाला नाही का? प्रा. सचिन सानप यांचा सवाल 

एज्युवार्ता न्यूज नेटवर्क 

पुणे: पुणे शिक्षक मतदार संघाचे निवडणूक जाहीर झाले असून भारतीय जनता पक्षाने एका संस्थाचालकाला उमेदवारी जाहीर केले आहे. त्यामुळे भारतीय जनता पक्षाला पाच जिल्ह्यांमध्ये एकही शिक्षक उमेदवार मिळाला नाही का? असा सवाल प्राध्यापक सचिन सानप यांनी रविवारी पत्रकारांशी बोलताना उपस्थित केला. तसेच विविध शिक्षक संघटनांनी दिलेल्या पाठिंब्याच्या जोरावर सोमवारी दुपारी १ वाजता उमेदवारी अर्ज दाखल करणार असल्याचे सानप यांनी स्पष्ट केले.

पुणे शिक्षक मतदार संघाच्या निवडणुकीसाठी अर्ज दाखल करण्यास दोन दिवसांचा कालावधी बाकी असताना भारतीय जनता पक्षाने कौस्तुभ गावडे यांना शिक्षक मतदार संघाची उमेदवारी जाहीर केली. काँग्रेस पक्षाने जयंत आसगावकर यांना उमेदवारी दिली आहे. त्यामुळे इच्छुक उमेदवार सचिन सानप यांनी रविवारी पत्रकारांशी संवाद साधून आपली भूमिका स्पष्ट केली. ते म्हणाले, शिक्षकांचा आमदार हा शिक्षकच असला पाहिजे. शिक्षकांना त्यांच्या सहकाऱ्यांच्या प्रश्नांची जाण असते. मात्र, भारतीय जनता पक्षाने संस्थाचालक असलेल्या व्यक्तीला उमेदवारी दिली आहे. शिक्षक हे सुजान आहेत. त्यामुळे शिक्षकाला मतदान करावे, की संस्थेचालकाला मतदान करावे याबाबत आता शिक्षकच निर्णय घेतील. 

सर्व संघटनांच्या प्रतिनिधींना बरोबर घेऊन सोमवारी मी उमेदवारी अर्ज दाखल करण्यासाठी जाणार आहे. अनेक महिन्यांपासून शिक्षक संघटनांनी दिलेल्या पाठिंब्याच्या जोरावर निवडणूक लढणार आहे. सध्याचे शिक्षक आमदार यांनी शिक्षकांचे कोणते प्रश्न सोडले हे सांगितले तरी बरे. शिक्षकांना शालाबाह्य कामे दिली जातात, जनावरे मोजण्यापासून ते दारूच्या दुकानासमोर रांगा लावण्याची कामे सुद्धा शिक्षकांवर सोपवली जातात. ही शिक्षकांची भर थट्टा असून या शिक्षकांचे वर्षानुवर्षे प्रलंबित असलेले प्रश्न सोडवण्यासाठी मी निवडणूक लढवत आहे, असेही सानप यांनी सांगितले.