गांधी जयंतीनिमित्त प्रियदर्शनी स्कूलमध्ये स्वच्छता अभियान

एज्युवार्ता न्यूज नेटवर्क 

पिंपरी चिंचवड परिसरातील मोशी येथील प्रियदर्शनी स्कूलमध्ये  राष्ट्रपिता महात्मा गांधी यांच्या जयंतीनिमित्त विविध उपक्रमांचे आयोजन करण्यात आले. कार्यक्रमाची सुरुवात महात्मा गांधी यांच्या प्रतिमेस पुष्पहार अर्पण करून अभिवादनाने करण्यात आली. यावेळी विद्यार्थ्यांनी व शिक्षकांनी गांधीजींच्या सत्य, अहिंसा, साधेपणा आणि स्वच्छतेच्या विचारांचे स्मरण केले.

गांधी जयंतीचे औचित्य साधून शाळेच्या परिसरात विशेष स्वच्छता अभियान राबविण्यात आले. या अभियानात विद्यार्थी, शिक्षक व शिक्षकेतर कर्मचाऱ्यांनी उत्स्फूर्त सहभाग घेतला. विशेष म्हणजे स्वच्छता अभियानाची सुरुवात विद्यार्थ्यांनी स्वतःच्या दप्तरापासून केली. त्यानंतर वर्गखोल्या, शाळेचा परिसर, मार्ग तसेच आजूबाजूचा परिसर स्वच्छ करण्यात आला.

विद्यार्थ्यांना कचरा योग्य ठिकाणी टाकणे, ओला व सुका कचरा वेगळा करणे तसेच प्लास्टिकचा वापर टाळणे याबाबत मार्गदर्शन करण्यात आले. स्वच्छता ही केवळ एका दिवसापुरती मर्यादित न राहता दैनंदिन जीवनशैलीचा भाग बनली पाहिजे, असा संदेश विद्यार्थ्यांना देण्यात आला.

स्वच्छतेसोबतच विद्यार्थ्यांमध्ये दया, करुणा आणि प्राणी-पक्ष्यांप्रती संवेदनशीलता निर्माण व्हावी, या उद्देशाने पक्ष्यांना दाणे व खाद्य देण्याचा दयाळूपणाचा उपक्रमही घेण्यात आला. या माध्यमातून सर्व सजीवांप्रती प्रेम, जिव्हाळा आणि माणुसकी जपण्याचा संदेश देण्यात आला.

“स्वच्छता हीच सेवा” या भावनेतून स्वच्छ व निरोगी परिसर राखण्याचा संकल्प विद्यार्थ्यांनी केला. या उपक्रमातून विद्यार्थ्यांमध्ये सामाजिक जबाबदारी, स्वयंशिस्त, सहकार्याची भावना आणि पर्यावरणाबद्दलची संवेदनशीलता विकसित करण्याचा प्रयत्न करण्यात आला.  गांधीजींच्या स्वच्छता व समाजसेवेच्या विचारांना प्रत्यक्ष कृतीतून आदरांजली वाहणारा हा उपक्रम उत्साहपूर्ण व प्रेरणादायी वातावरणात संपन्न झाला.