सीआरपीएफ स्पोर्ट्स कोटा भरती २०२६: खेळाडूंसाठी ५२१ पदांची सुवर्णसंधी
केंद्रीय राखीव पोलीस दलाने (सीआरपीएफ) स्पोर्ट्स कोटा अंतर्गत हेड कॉन्स्टेबल आणि कॉन्स्टेबल पदांसाठी मोठी भरती जाहीर केली आहे. एकूण ५२१ जागा उपलब्ध असून पुरुष व महिला दोन्ही उमेदवार अर्ज करू शकतात.
Eduvarta
एज्युवार्ता न्यूज नेटवर्क
केंद्रीय राखीव पोलीस दलाने (सीआरपीएफ) स्पोर्ट्स कोटा अंतर्गत हेड कॉन्स्टेबल आणि कॉन्स्टेबल पदांसाठी मोठी भरती जाहीर केली आहे. एकूण ५२१ जागा उपलब्ध असून पुरुष व महिला दोन्ही उमेदवार अर्ज करू शकतात. ही संधी सामान्य उमेदवारांसाठी नसून राष्ट्रीय किंवा आंतरराष्ट्रीय स्तरावर पदक विजेते, पोझिशन होल्डर किंवा सहभागी राहिलेल्या गुणवंत खेळाडूंसाठी आहे. अर्ज प्रक्रिया १२ ऑक्टोबर २०२६ पासून सुरू होईल आणि ११ नोव्हेंबर २०२६ पर्यंत ऑनलाइन अर्ज स्वीकारले जातील. इच्छुक आणि टाञ उमेदवारांना अधिकृत वेबसाइट rect.crpf.gov.in वर जाऊन ऑनलाइन पद्धतीने अर्ज करता येईल. अर्ज जमा केल्यानंतर १२ ते १४ नोव्हेंबर दरम्यान दुरुस्तीचीही संधी मिळेल.
या भरतीत हेड कॉन्स्टेबलची १८२ पदे आहेत, ज्यात १५० पुरुष आणि ३२ महिलांसाठी राखीव आहेत. या पदासाठी पे मॅट्रिक्स लेव्हल-४ अंतर्गत २५ हजार ५०० ते ८१ हजार १०० रुपये वेतनमान निश्चित करण्यात आले आहे. कॉन्स्टेबल पदासाठी ३३९ जागा असून त्यात २५८ पुरुष आणि ८१ महिला उमेदवारांचा समावेश आहे. कॉन्स्टेबल पदावर लेव्हल-३ नुसार २१ हजार ७०० ते ६९ हजार १०० रुपये पगार मिळेल. दोन्ही पदांसाठी भारताचे सामान्य निवासी पुरुष आणि महिला उमेदवार पात्र आहेत.
पात्रतेसाठी संबंधित खेळात राष्ट्रीय किंवा आंतरराष्ट्रीय अजिंक्यपद स्पर्धेत यश मिळवणे आवश्यक आहे. भरती जाहिरात प्रकाशित झाल्याच्या तारखेपासून मागील दोन वर्षांतील स्पोर्ट्स प्रमाणपत्र किंवा उपलब्धीच वैध मानली जाईल. उमेदवारांची मेरीट यादी खेळातील कामगिरी आणि प्रमाणपत्रांच्या आधारे तयार केली जाईल. गुण समान असल्यास जास्त वय असलेल्या उमेदवाराला प्राधान्य दिले जाईल.
ही भरती खेळाडूंना सरकारी नोकरीत स्थिरावण्याची उत्तम संधी आहे. इच्छुक उमेदवारांनी अधिकृत अधिसूचना काळजीपूर्वक वाचावी आणि वेळेवर अर्ज करावा. पात्र खेळाडूंनी आपली कागदपत्रे तयार ठेवून अर्ज प्रक्रिया पूर्ण करावी, जेणेकरून ही संधी हातातून निघून जाणार नाही.
