टाइम्स हायर एज्युकेशन २०२७ क्रमवारी जाहीर; पुणे विद्यापीठ,डॉ. डी. वाय. पाटील,आयसर कुठे?
टाइम्स हायर एज्युकेशनने २०२७ साठीची जागतिक विद्यापीठ क्रमवारी नुकतीच जाहीर केली आहे. या प्रतिष्ठित क्रमवारीत देशातील एकूण १५४ विद्यापीठांनी स्थान मिळवले असून गेल्या वर्षीच्या तुलनेत १५ विद्यापीठे वाढली आहेत. मात्र पहिल्या पाचशे विद्यापीठांमध्ये भारतातील केवळ तीनच संस्थांचा समावेश झाला आहे.
Eduvarta
एज्युवार्ता न्यूज नेटवर्क
टाइम्स हायर एज्युकेशनने २०२७ साठीची जागतिक विद्यापीठ क्रमवारी नुकतीच जाहीर केली आहे. या प्रतिष्ठित क्रमवारीत देशातील एकूण १५४ विद्यापीठांनी स्थान मिळवले असून गेल्या वर्षीच्या तुलनेत १५ विद्यापीठे वाढली आहेत. मात्र पहिल्या पाचशे विद्यापीठांमध्ये भारतातील केवळ तीनच संस्थांचा समावेश झाला आहे. या क्रमवारीत एकूण ११८ देशांतील २ हजार २९७ विद्यापीठांचे मूल्यमापन करण्यात आले. अध्यापन, संशोधन पर्यावरण, संशोधन गुणवत्ता, आंतरराष्ट्रीय दृष्टिकोन आणि उद्योग या निकषांवर आधारित ही क्रमवारी तयार करण्यात आली आहे.
जागतिक पातळीवर ऑक्सफर्ड विद्यापीठाने सलग अकराव्या वर्षी पहिले स्थान राखले आहे. दुसऱ्या स्थानावर मॅसाच्युसेट्स इन्स्टिट्यूट ऑफ टेक्नॉलॉजी तर तिसऱ्या स्थानावर प्रिन्स्टन आणि स्टॅनफर्ड विद्यापीठे विभागून आहेत. भारतातील संस्थांपैकी इंडियन इन्स्टिट्यूट ऑफ सायन्सने २५४ वे स्थान मिळवून आघाडी घेतली आहे. त्यानंतर सविता इन्स्टिट्यूट ऑफ मेडिकल अँड टेक्निकल सायन्सेस ३२५ ते ३५० तर शूलिनी युनिव्हर्सिटी ऑफ बायोटेक्नॉलॉजी अँड मॅनेजमेंट सायन्सेस ४५१ ते ५०० या गटात आहे. जामिया मिलिया इस्लामिया आणि केआयआयटी युनिव्हर्सिटी ५०१ ते ५५० गटात राहिल्या आहेत.
काही प्रमुख आयआयटी आणि एनआयटी तसेच नामांकित खासगी विद्यापीठे मात्र पहिल्या पाचशे बाहेर राहिल्याचे दिसून आले आहे. महाराष्ट्रातील काही संस्थांनी मात्र क्रमवारीत स्थान मिळवले आहे. सिम्बायोसिस आंतरराष्ट्रीय विद्यापीठाने ६०१ ते ६५० गटात स्थान मिळवले आहे. डॉ. डी. वाय. पाटील विद्यापीठ, सावित्रीबाई फुले पुणे विद्यापीठ, आयसर पुणे आणि अडाणी इन्स्टिट्यूट ऑफ हायर एज्युकेशन अँड रीसर्च यांनी १००१ ते १२०० गटात स्थान मिळवले आहे.
कोल्हापूरचे शिवाजी विद्यापीठ आणि एमआयटी एडीटी विद्यापीठ १४०१ ते १६०० गटात आहेत. २०२६ च्या क्रमवारीच्या तुलनेत यंदा काही विद्यापीठांचे स्थान सुधारले असले तरी काहींची थोडी घसरणही दिसून येते. ही क्रमवारी जागतिक स्तरावरील उच्च शिक्षणाच्या गुणवत्तेचे महत्त्वाचे मापदंड मानली जाते. भारतीय विद्यापीठांनी अधिक संशोधन, आंतरराष्ट्रीय सहकार्य आणि उद्योग जोडणीवर भर देणे आवश्यक असल्याचे तज्ज्ञांचे मत आहे. ही क्रमवारी देशातील उच्च शिक्षण क्षेत्राला नवीन दिशा देणारी ठरली आहे.
