प्रियदर्शनी स्कूलमध्ये अग्निसुरक्षा प्रशिक्षण व प्रात्यक्षिक सराव

 एज्युवार्ता न्यूज नेटवर्क 

पुण्यातील नामांकित शाळांच्या यादीतील मोशी येथील प्रियदर्शनी स्कूलमध्ये  शिक्षक, कर्मचारी आणि विद्यार्थ्यांसाठी अग्निसुरक्षा प्रशिक्षण व प्रात्यक्षिक सरावाचे (Mock Drill) आयोजन करण्यात आले. शाळेतील अग्निसुरक्षेबाबत जागरूकता वाढविणे तसेच आपत्कालीन परिस्थितीत प्रभावीपणे व सुरक्षितपणे प्रतिसाद देण्यासाठी आवश्यक सज्जता निर्माण करणे, हा या प्रशिक्षणाचा मुख्य उद्देश होता.

या प्रशिक्षणात इयत्ता ११वी व १२वीतील विद्यार्थ्यांनीही उत्स्फूर्त सहभाग घेतला. SAP Engineers चे प्रतिनिधी  राहुल शिरसाट यांनी अग्निशामक यंत्रणेच्या वापराबाबत मार्गदर्शन करत प्रत्यक्ष प्रात्यक्षिक करून दाखविले. यावेळी आगीचे विविध प्रकार, अग्निशामक यंत्रांचा योग्य वापर, त्यांची कार्यपद्धती तसेच आग प्रतिबंधात्मक उपाययोजनांचे महत्त्व याबाबत सविस्तर माहिती देण्यात आली.

प्रशिक्षणादरम्यान अग्निशामक यंत्राचा सुरक्षित व प्रभावी वापर, विविध प्रकारच्या अग्निशामक यंत्रांचा उपयोग, फायर होजचा योग्य वापर तसेच आपत्कालीन परिस्थितीत अग्निशमन यंत्रणेची कार्यपद्धती यांचे प्रत्यक्ष प्रशिक्षण देण्यात आले. शिक्षक, कर्मचारी, मावशी तसेच सुरक्षा पथकातील सदस्यांनी या प्रशिक्षणात सहभाग घेतला.

शाळेतील उपलब्ध अग्निसुरक्षा प्रणाली आणि उपकरणांचे कार्य व वापर याबाबतही उपस्थितांना माहिती देण्यात आली. प्रशिक्षणादरम्यान शिक्षक व कर्मचाऱ्यांनी सक्रिय सहभाग नोंदवत आपत्कालीन परिस्थिती हाताळण्यासाठी आवश्यक कौशल्ये आत्मसात केली.

शाळा व्यवस्थापनाने राहुल शिरसाट आणि SAP Engineers यांच्या प्रशिक्षण व मार्गदर्शनाबद्दल आभार व्यक्त केले. या प्रशिक्षणामुळे विद्यार्थ्यांसह शिक्षक व कर्मचाऱ्यांमध्ये अग्निसुरक्षेबाबत जागरूकता वाढण्यासोबतच आपत्कालीन परिस्थितीत तातडीने व योग्य पद्धतीने प्रतिसाद देण्याची क्षमता अधिक मजबूत झाली. सुरक्षित व संरक्षित शैक्षणिक वातावरण निर्माण करण्याच्या शाळेच्या प्रयत्नांना या उपक्रमामुळे अधिक बळ मिळाले.