महाज्योती-वानार्टी चाळणी परीक्षा: दिल्ली केंद्र मिळालेल्यांना महाराष्ट्रात संधी, केंद्र बदलाची सुविधा उपलब्ध
महाज्योती आणि वनार्टी संस्थेमार्फत २०२६-२७ या आर्थिक वर्षात विविध स्पर्धा परीक्षांच्या पूर्वतयारीसाठी विशेष प्रशिक्षणाची संधी उपलब्ध करून देण्यात येणार आहे. या प्रशिक्षणासाठी विद्यार्थ्यांची निवड करण्याकरिता चाळणी परीक्षा ७ ऑक्टोबर ते ९ ऑक्टोबर २०२६ या कालावधीत आयोजित करण्यात आली आहे.
Eduvarta
एज्युवार्ता न्यूज नेटवर्क
महाज्योती आणि वनार्टी संस्थेमार्फत २०२६-२७ या आर्थिक वर्षात विविध स्पर्धा परीक्षांच्या पूर्वतयारीसाठी विशेष प्रशिक्षणाची संधी उपलब्ध करून देण्यात येणार आहे. या प्रशिक्षणासाठी विद्यार्थ्यांची निवड करण्याकरिता चाळणी परीक्षा ७ ऑक्टोबर ते ९ ऑक्टोबर २०२६ या कालावधीत आयोजित करण्यात आली आहे. संघ लोकसेवा आयोगाच्या नागरी सेवा, महाराष्ट्र लोकसेवा आयोगाच्या राज्यसेवा, अभियांत्रिकी सेवा, संयुक्त गट-ब व गट-क तसेच लष्करातील सैनिक भरती परीक्षेपूर्व प्रशिक्षणासाठी ही निवड प्रक्रिया राबविली जाणार आहे. त्यामुळे संबंधित परीक्षांची तयारी करणाऱ्या हजारो विद्यार्थ्यांसाठी ही एक महत्त्वाची संधी ठरत आहे.
चाळणी परीक्षेसाठी अर्ज केलेल्या विद्यार्थ्यांना मोठा दिलासा देण्यात आला आहे. विद्यार्थ्यांच्या मागणीनुसार दिल्ली येथे परीक्षा केंद्र उपलब्ध करून देण्यात आले होते. मात्र, सध्या दिल्ली येथे जाऊन परीक्षा देणे शक्य नसलेल्या विद्यार्थ्यांची अडचण लक्षात घेऊन आता त्यांना महाराष्ट्रातच परीक्षा केंद्र उपलब्ध करून देण्यात येणार आहे. ज्या विद्यार्थ्यांना दिल्ली केंद्र मिळाले आहे आणि सद्यस्थितीत तेथून परीक्षा देणे शक्य नाही, अशा सर्व विद्यार्थ्यांना महाराष्ट्रातील केंद्रावर परीक्षा देण्याची सुविधा देण्यात येत आहे.
त्याचबरोबर परीक्षा केंद्रात पुन्हा बदलाची सुविधाही खुली करण्यात आली आहे. ज्या विद्यार्थ्यांना सध्या महाराष्ट्रातील परीक्षा केंद्र देण्यात आले आहे आणि आता दिल्ली येथून चाळणी परीक्षा देण्याची इच्छा आहे, अशा विद्यार्थ्यांसाठी पुन्हा दिल्ली येथील केंद्र उपलब्ध करून देण्यात येत आहे. विद्यार्थ्यांच्या सोयी आणि मागणीनुसार महाराष्ट्र किंवा दिल्ली येथून परीक्षा देण्याची लवचिकता दिल्याने अनेकांना मोठा दिलासा मिळाला आहे.
या निर्णयामुळे विद्यार्थ्यांना प्रवास, निवास आणि इतर अडचणींशिवाय आपल्या सोयीच्या ठिकाणाहून परीक्षा देता येणार आहे. महाज्योती व वनार्टीने विद्यार्थ्यांच्या मागण्यांचा विचार करून ही सुविधा उपलब्ध करून दिल्याने चाळणी परीक्षेला मोठा प्रतिसाद मिळण्याची शक्यता आहे. इच्छुक विद्यार्थ्यांनी अधिकृत सूचनांचे पालन करून आपल्या परीक्षा केंद्राबाबत आवश्यक ती प्रक्रिया पूर्ण करावी, असे आवाहन करण्यात आले आहे.
