पुणे पदवीधर, शिक्षक मतदारसंघाच्या मतदारांनी यादीत नाव तपासा; अंतिम मतदार यादी १२ जानेवारी

एज्युवार्ता न्यूज नेटवर्क 

पुणे पदवीधर तसेच पुणे शिक्षक मतदारसंघातील मतदारांनी आगामी निवडणुकीच्या पार्श्वभूमीवर मतदार यादीत आपले नाव समाविष्ट आहे की नाही, याची ऑनलाइन पद्धतीने पडताळणी करावी, असे आवाहन करण्यात आले आहे. मतदारांना घरबसल्या नाव तपासता यावे, यासाठी mahaelection.gov.in या संकेतस्थळावर ऑनलाइन सुविधा उपलब्ध करून देण्यात आली आहे.

मतदारांनी संकेतस्थळावर जाऊन ‘Electoral Registration’ हा पर्याय निवडावा. त्यानंतर संबंधित मतदारसंघानुसार ‘Graduate’ किंवा ‘Teachers’ हा पर्याय निवडून मतदार यादीतील नाव शोधता येणार आहे.

नाव शोधण्यासाठी Acknowledgement Number, Current Roll, Final Roll तसेच District–Taluka–Name अशा विविध पर्यायांची सुविधा उपलब्ध आहे. Acknowledgement Number उपलब्ध नसल्यास जिल्हा, तालुका आणि मतदाराचे नाव टाकूनही शोध घेता येतो. आवश्यक कॅप्चा भरून ‘Search’ केल्यानंतर संबंधित मतदाराची नोंद, मतदान केंद्र आणि अन्य आवश्यक तपशील पाहता येणार आहेत.

पुणे पदवीधर मतदारसंघाची अंतिम मतदार यादी १२ जानेवारी २०२५ रोजी प्रसिद्ध झाली आहे. त्यानंतरची पूरक मतदार यादी १२ ऑक्टोबर रोजी प्रसिद्ध होणार आहे. त्यामुळे पूरक यादी प्रसिद्ध झाल्यानंतर मतदारांनी पुन्हा एकदा आपले नाव तसेच मतदान केंद्राची माहिती तपासून घेणे आवश्यक आहे.

पूरक मतदार यादीत समावेश झाल्यामुळे काही मतदारांचा पत्ता किंवा भाग क्रमांक बदलण्याची शक्यता असल्याने अंतिमतः प्रसिद्ध झालेल्या मतदार यादीतील तपशीलाची खात्री करून घेण्याचे आवाहन करण्यात आले आहे.

मतदारांनी आपले नाव मतदार यादीत असल्याची खात्री करून मतदानाचा हक्क बजावावा, असे आवाहन प्रशासनाकडून करण्यात आले आहे.