सरकारी नोकरीची सुवर्णसंधी; रेल्वेमध्ये २००८ अप्रेंटिस जागांची मोठी भरती सुरू
उत्तर पश्चिम रेल्वेने NWR प्रशिक्षणार्थी (अप्रेंटिस) पदांसाठी एकूण २००८ जागांची अधिकृत भरती जाहीर केली आहे. रेल्वे क्षेत्रात करिअर घडवू इच्छिणाऱ्या तरुण उमेदवारांसाठी ही एक महत्त्वपूर्ण संधी ठरली आहे.
Eduvarta
एज्युवार्ता न्यूज नेटवर्क
उत्तर पश्चिम रेल्वेने (NWR) प्रशिक्षणार्थी (अप्रेंटिस) पदांसाठी एकूण २००८ जागांची अधिकृत भरती जाहीर केली आहे. रेल्वे क्षेत्रात करिअर घडवू इच्छिणाऱ्या तरुण उमेदवारांसाठी ही एक महत्त्वपूर्ण संधी ठरली आहे. फिटर, इलेक्ट्रिशियन, वेल्डर, कारपेंटर, डिझेल मेकॅनिक, मशीनिस्ट आणि कॉम्प्युटर ऑपरेटर यांसारख्या विविध तांत्रिक ट्रेड्समध्ये उमेदवारांची निवड केली जाणार आहे. इच्छुक आणि पात्र उमेदवार रेल्वेचे अधिकृत संकेतस्थळ nwr.indianrailways.gov.in वर जाऊन ६ नोव्हेंबरपर्यंत ऑनलाईन पद्धतीने अर्ज करू शकतात.
या भरतीसाठी अर्ज प्रक्रिया ७ ऑक्टोबर २०२६ पासून सुरू होणार असून अंतिम तारीख ६ नोव्हेंबर २०२६ आहे. इच्छुक उमेदवारांनी अधिकृत संकेतस्थळ nwr.indianrailways.gov.in वर जाऊन संपूर्ण माहिती आणि अर्ज प्रक्रिया तपासून पाहावी. अर्जासाठी सामान्य आणि इतर मागासवर्गीय (OBC) उमेदवारांना १०० रुपये शुल्क भरावे लागेल, तर महिला, अनुसूचित जाती (SC), अनुसूचित जमाती (ST) आणि दिव्यांग उमेदवारांना कोणतेही शुल्क नाही.
शैक्षणिक पात्रतेबाबत, उमेदवाराने किमान ५० टक्के गुणांसह दहावी उत्तीर्ण असणे आणि संबंधित ट्रेडमध्ये आयटीआय (ITI) पूर्ण केलेले असणे अनिवार्य आहे. वयोमर्यादा १५ ते २४ वर्षे ठेवण्यात आली आहे. शासकीय नियमांनुसार अनुसूचित जाती आणि अनुसूचित जमाती प्रवर्गातील उमेदवारांना पाच वर्षे तर इतर मागासवर्गीय उमेदवारांना तीन वर्षांची वयोमर्यादा सूट लागू आहे.
निवड प्रक्रिया पूर्णपणे गुणवत्तेवर आधारित राहील. उमेदवाराच्या दहावीतील टक्केवारी आणि आयटीआयमधील गुण एकत्रित करून गुणवत्ता यादी तयार केली जाईल. कोणत्याही प्रकारची लेखी परीक्षा किंवा मुलाखत अपेक्षित नसल्याने पात्र उमेदवारांना थेट मेरिट लिस्टद्वारे संधी मिळण्याची शक्यता आहे.
