नर्सिंग अभ्यासक्रमांच्या प्रवेशाला ३० नोव्हेंबरपर्यंत मुदतवाढ

एज्युवार्ता न्यूज नेटवर्क 

भारतीय नर्सिंग कौन्सिलने (Nursing Council of India) परिचारिक विषयक विविध अभ्यासक्रमांच्या (Courses in Nursing) प्रवेश प्रक्रियेला पुन्हा एकदा मुदतवाढ (Extension of admission process) दिली आहे. त्यामुळे बीएससी नर्सिंग, एम.एससी नर्सिंग, एएनएम, जीएनएम, पीबीबीएस्सी नर्सिंग, पोस्ट बेसिक डिप्लोमा आणि क्रिटिकल केअर अभ्यासक्रम परिचारिका (एनपीसीसी) आदी अभ्यासक्रमांसाठी विद्यार्थ्यांना आता ३० नोव्हेंबरपर्यंत प्रवेश घेता येणार आहे. 

कौन्सिलने प्रवेशासाठी यापूर्वी ३० सप्टेंबरची मुदत दिली होती. त्यानंतर ३१ ऑक्टोबरपर्यंत पहिली मुदतवाढ केली. मात्र, अजूनही प्रवेश सुरू असल्याने पुन्हा एकदा मुदतवाढ दिली आहे. यानंतर कोणत्याही प्रकारची मुदतवाढ देण्यात येणार नसल्याचे स्पष्ट करण्यात आले आहे. 

ही मुदतवाढ देताना प्रवेशाबाबत मार्गदर्शक तत्त्वे प्रसिद्ध करण्यात आली आहेत. त्यानुसार ३१ ऑक्टोबरपर्यंत झालेले प्रवेश नियमित वर्गातील प्रवेश समजण्यात येणार असल्याचे कौन्सिलने स्पष्ट केले आहे. तर १ ते ३० नोव्हेंबरदरम्यान होणारे प्रवेश हे अनियमित प्रवेश असतील.

प्रवेशाबाबत सूचनांचे काटेकोरपणे पालन करण्याचे निर्देश नर्सिंग कॉलेजांना देण्यात आले आहेत. दरम्यान, आता पुन्हा मुदतवाढ दिल्यानंतर नर्सिंगच्या विविध अभ्यासक्रमांच्या प्रवेश संख्येत वाढ होण्याची चिन्हे आहेत.