साताऱ्यात शिक्षकाच्या रागाचा भयंकर शेवट: १७ वर्षीय मुलीची हत्या; पुरावे नष्ट करण्यासाठी एआयचा आधार
साताऱ्यात एका शिक्षक वडिलांनी स्वतःच्या १७ वर्षीय मुलीची हत्या केल्याचा धक्कादायक प्रकार उघडकीस आला आहे. पुरुषोत्तम कदम यांनी आपल्या मुलगी आर्याशी झालेल्या तीव्र वादात तिला ठार केले. मुलीने गेल्या दोन वर्षांपासून चुकीची संगत धरल्याचे आणि व्यसनाधीन झाल्याचे आई-वडिलांना वाटत होते.
Eduvarta
एज्युवार्ता न्यूज नेटवर्क
साताऱ्यात एका शिक्षक वडिलांनी स्वतःच्या १७ वर्षीय मुलीची हत्या केल्याचा धक्कादायक प्रकार उघडकीस आला आहे. पुरुषोत्तम कदम यांनी आपल्या मुलगी आर्याशी झालेल्या तीव्र वादात तिला ठार केले. मुलीने गेल्या दोन वर्षांपासून चुकीची संगत धरल्याचे आणि व्यसनाधीन झाल्याचे आई-वडिलांना वाटत होते. आईही शिक्षिका असून दोघांनी अनेकदा समजावण्याचा प्रयत्न केला. मात्र मुलगी आई-वडिलांशी उलटे बोलत असे आणि तासनतास फोनवर व्यस्त राहत असे. यामुळे वडिलांमध्ये चिंता आणि राग वाढत गेला. एका क्षणात झालेल्या या दुर्घटनेने संपूर्ण कुटुंब उद्ध्वस्त झाले आणि गावात चर्चेला उधाण आले.
हत्या झाल्यानंतर आरोपीने पुरावे नष्ट करण्यासाठी कृत्रिम बुद्धिमत्तेची मदत घेण्याचा प्रयत्न केला. त्याने एआयला सांगितले की नकळत मुलीचा खून झाला असून पुरावा कसा नष्ट करावा. एआयने मात्र स्पष्ट नकार दिला. त्याने सांगितले की ही मोठी चूक आहे आणि गुन्हेगारी कृत्यांना मदत करणारी माहिती देता येणार नाही. पोलिसांना ताबडतोब कळवा, असे उत्तर दिले. एआयने मदत नाकारल्यानंतर आरोपीने रक्ताने माखलेले कपडे आणि संबंधित वस्तू स्वच्छ करण्याचा प्रयत्न केला. तसेच काही पुरावे घराबाहेर टाकले.
पोलिसांना संशय आल्यानंतर घरात तपासणी केली. तेव्हा रक्ताचे डाग आणि संबंधित वस्तू सापडल्या. आरोपीने सुरुवातीला मुलगी स्वतः डोके भिंतीवर आपटून जखमी झाल्याचे सांगितले. मात्र पुराव्यांच्या आधारे पोलिसांनी त्याला अटक केली. कडक शिस्तीचे शिक्षक असलेल्या पुरुषोत्तम कदम यांच्या घरातून समोर आलेली ही घटना संपूर्ण परिसरात खळबळ उडवणारी ठरली.
या घटनेने समाजात मोठी चर्चा सुरू झाली आहे. पालक-मुलांमधील संवाद आणि शिस्तीच्या मर्यादांचा मुद्दा पुन्हा ऐरणीवर आला आहे. एआयसारख्या तंत्रज्ञानाचा गैरवापर करण्याच्या प्रयत्नालाही तंत्रज्ञानानेच विरोध केल्याचे उदाहरण या प्रकरणात दिसून आले. पोलिस तपास सुरू असून आरोपीवर कठोर कारवाई होण्याची शक्यता आहे.
