पेपरफुटी प्रकरणात विद्यार्थ्यांचा ठिय्या; रोहित पवारांचा रात्रीपासून एस. एम. जोशी पुलावर सत्याग्रह
महाराष्ट्र लोकसेवा आयोगाच्या औषध निरीक्षक परीक्षेतील पेपरफुटीमुळे राज्यभरातील स्पर्धा परीक्षेची तयारी करणाऱ्या हजारो उमेदवारांमध्ये संतापाची लाट उसळली आहे.
Eduvarta
एज्युवार्ता न्यूज नेटवर्क
महाराष्ट्र लोकसेवा आयोगाच्या औषध निरीक्षक परीक्षेतील पेपरफुटीमुळे राज्यभरातील स्पर्धा परीक्षेची तयारी करणाऱ्या हजारो उमेदवारांमध्ये संतापाची लाट उसळली आहे. या घोटाळ्याची नैतिक जबाबदारी स्वीकारून आयोगाचे अध्यक्ष विवेक भिमनवार आणि सचिव महेंद्र हरपाळकर यांनी तातडीने राजीनामा द्यावा, ही मुख्य मागणी घेऊन पुण्यातील एस. एम. जोशी पुलावर विद्यार्थ्यांनी गुरुवारी सायंकाळपासून ठिय्या आंदोलन सुरू केले आहे. राष्ट्रवादी काँग्रेस शरदचंद्र पवार पक्षाचे आमदार रोहित पवार यांनी स्वतः रात्रभर विद्यार्थ्यांसोबत या आंदोलनात सहभाग घेतला असून, त्यांनी अध्यक्षांच्या राजीनाम्याशिवाय माघार न घेण्याचा निर्धार व्यक्त केला आहे.
विद्यार्थ्यांच्या शिष्टमंडळाने नुकतीच मुख्यमंत्री देवेंद्र फडणवीस यांची भेट घेतली होती. त्यावेळी मुख्यमंत्र्यांनी सचिवाची बदली आणि अध्यक्षांची न्यायालयीन चौकशी करण्याचे आश्वासन दिले. यामुळे काही सदस्यांनी दोन ऑक्टोबरचे आंदोलन मागे घेतले. मात्र गुरुवारी सायंकाळी इंदुलाल कॉम्प्लेक्स येथील बैठकीत बहुसंख्य परीक्षार्थ्यांनी अध्यक्षांच्या तडकाफडकी राजीनाम्याची मागणी कायम ठेवली. मुख्यमंत्र्यांशी झालेल्या चर्चेत ही मागणी मान्य न झाल्याने विद्यार्थी पुन्हा रस्त्यावर उतरले.
रोहित पवार यांनी थेट पुलावर मुक्काम ठोकत विद्यार्थ्यांना पाठिंबा दिला. “एमपीएससी अध्यक्ष विवेक भिमनवार यांचा राजीनामा हीच प्रमुख मागणी आहे. राज्य सरकार याकडे जाणीवपूर्वक दुर्लक्ष करत आहे. त्यामुळे आम्ही सत्याग्रह सुरू केला आहे,” असा इशारा त्यांनी दिला. शुक्रवारी खासदार सुप्रिया सुळे आणि आमदार विश्वजीत कदम यांनी आंदोलनस्थळी भेट देऊन पाठिंबा दर्शविण्याचे निश्चित केले आहे.
विद्यार्थी स्पर्धा परीक्षा ऑफलाइन पद्धतीनेच घेण्याची आणि इतर परीक्षांमध्येही पेपरफुटी झाली आहे का, याची सखोल चौकशी करण्याची मागणी करत आहेत. एस. एम. जोशी पुलावरील या सत्याग्रहामुळे प्रशासनावर आणि राज्य सरकारवर दबाव वाढला आहे. विद्यार्थी राजीनाम्याशिवाय आंदोलन मागे न घेण्याच्या भूमिकेवर ठाम आहेत.
या आंदोलनावर भाजप आमदार विक्रम पाचपुते यांनी तीव्र प्रतिक्रिया दिली. मुख्यमंत्र्यांनी तीन वेळा चर्चा केली असतानाही काँग्रेस आणि राष्ट्रवादीच्या कार्यकर्त्यांसोबत अरेरावीचे आंदोलन करत असल्याचा आरोप त्यांनी केला. विनापरवानगीच्या आंदोलनात विद्यार्थ्यांवर गुन्हे दाखल होऊन करिअर खराब होण्याची शक्यता व्यक्त करत पाचपुते यांनी रोहित पवारांना अर्बन नक्षलवादी तयार करत असल्याचे म्हटले आहे. पत्रकारांवरील हल्ल्याचाही उल्लेख करत त्यांनी या निदर्शनास टीका केली.
