SPPU विद्यापीठाची नाचक्की; दुसऱ्यांदा मेसवर FDA ची धाड,अन्न पदार्थात सापडले झुरळ, किडे
दोन दिवसांपूर्वी विद्यापीठातील मुलींच्या मेस मध्ये झुरळ, किडे व प्लास्टिकचे तुकडे आढळून आले होते. त्यावर विद्यार्थिनींनी प्रशासनाकडे तक्रारही केली होती. परंतु विद्यापीठाने मेसचालकाला समज देऊन सर्व प्रकार दडपण्याचा प्रयत्न केला.त्यानंतर आज एफडीएच्या अधिकाऱ्यांनी येऊन चौकशी केली.
Eduvarta
एज्युवार्ता न्यूज नेटवर्क
सावित्रीबाई फुले पुणे विद्यापीठात विद्यार्थ्यांना निकृष्ट दर्जाचे अन्न देण्याबरोबरच जेवणातून झुरळ, किडे खावे लागत असल्याची तक्रार विद्यापीठातील विद्यार्थिनींच्या वस्तीगृहातील मुलींनी केली होती. याबाबतचा व्हिडिओ सोशल मीडियावर व्हायरल झाला होता. मात्र, या सर्व घटनेची दखल घेऊन अन्न व औषध प्रशासनाच्या अधिकाऱ्यांनी मंगळवारी वस्तीगृहातील मेसवर धाड टाकून या सर्व घटनेची चौकशी केली. त्यामुळे ऑक्सफर्ड ऑफ द ईस्ट म्हणून घेणाऱ्या पुणे विद्यापीठाची चांगलीच नाचक्की झाली आहे.
सावित्रीबाई फुले पुणे विद्यापीठात विद्यार्थ्यांना अत्यंत निकृष्ट दर्जाचे जेवण दिले जाते. विद्यापीठातील विद्यार्थीच नाही तर प्राध्यापक व शिक्षकेतर कर्मचाऱ्यांना दर्जेदार गुणवत्तापूर्ण व सकस अन्न उपलब्ध करून देण्याबाबत गेल्या काही वर्षांपासून विद्यापीठ प्रशासन सपशेल फेल ठरले आहे. विद्यापीठाच्या अधिकार मंडळात याबाबत अनेक वेळा चर्चा झाली असली तरी त्यातून कोणतीही ठोस पावले उचलली गेली नाहीत. दोन दिवसांपूर्वी विद्यापीठातील मुलींच्या मेस मध्ये झुरळ, किडे व प्लास्टिकचे तुकडे आढळून आले होते. त्यावर विद्यार्थिनींनी प्रशासनाकडे तक्रारही केली होती. परंतु विद्यापीठाने मेसचालकाला समज देऊन सर्व प्रकार दडपण्याचा प्रयत्न केला.त्यानंतर आज एफडीएच्या अधिकाऱ्यांनी येऊन चौकशी केली.
विद्यापीठातील अनिकेत कॅन्टीन गेल्या अनेक वर्षांपासून बंद आहे. विद्यापीठात यापूर्वी ओल्ड कॅन्टीन, ओपन कॅन्टीन,आदर्श कॅन्टीन अशा वेगवेगळ्या ठिकाणी विद्यार्थ्यांना हवे असलेले अन्नपदार्थ मिळत होते. परंतु,चहा,मिसळ,वडापाव,डोसा या पलीकडे विद्यार्थ्यांना कोणतेच अन्नपदार्थ विद्यापीठाच्या कॅम्पस मधील परीक्षा विभागाजवळील कॅन्टीन मध्ये मिळत नाहीत. फूड मॉलमध्ये काही पदार्थ उपलब्ध असले तरी सर्वच विद्यार्थ्यांना फूड मॉलपर्यंत पायी जाणे शक्य नाही. फूड मॉल बाबतही विद्यार्थी संघटनांनी अनेक वेळा तक्रारी केल्या होत्या. परंतु आजही त्यात फारशा सुधारणा झालेल्या नाहीत.
विद्यार्थ्यांना खिचडी खाऊनच दिवस काढावे लागत आहेत. पैसे असूनही विद्यार्थी विद्यार्थ्यांना चांगले अन्नपदार्थ मिळत नाहीत. काही दिवसांपूर्वी विद्यापीठाने मेस दरवाढीचा निर्णय घेतला होता. अनेक दिवस विद्यापीठाच्या मुख्य इमारतीसमोर बसून विद्यार्थी संघटनांनी आंदोलन केल्यानंतर विद्यापीठाने मेस दरवाढीचा निर्णय मागे घेतला. विद्यापीठात विद्यार्थ्यांना सकस अन्न मिळाले नाही तर त्यांच्या आरोग्यावर परिणाम होणार आहे. त्यामुळे विद्यार्थ्यांचे काही बरे वाईट झाले तर त्याला जबाबदार कोण ? असा सवाल उपस्थित होत आहे.
