एमपीएससी पेपरफुटीनंतर आणखी एक मोठा घोटाळा; परीक्षा न देताच वैद्यकीय प्रमाणपत्रे वाटणाऱ्या आंतरराज्यीय रॅकेटचा पर्दाफाश
महाराष्ट्रात सध्या एमपीएससीच्या विविध परीक्षांतील पेपरफुटी प्रकरणे चर्चेत असताना विद्यार्थी पुण्यात आंदोलन करीत आहेत. पेपरफुटीची नैतिक जबाबदारी स्वीकारून आयोगाच्या अध्यक्षांनी राजीनामा द्यावा, अशी त्यांची मागणी आहे.
Eduvarta
एज्युवार्ता न्यूज नेटवर्क
महाराष्ट्रात सध्या एमपीएससीच्या विविध परीक्षांतील पेपरफुटी प्रकरणे चर्चेत असताना विद्यार्थी पुण्यात आंदोलन करीत आहेत. पेपरफुटीची नैतिक जबाबदारी स्वीकारून आयोगाच्या अध्यक्षांनी राजीनामा द्यावा, अशी त्यांची मागणी आहे. या पार्श्वभूमीवर राज्य सरकार आणि एमपीएससी अडचणीत सापडले असताना आणखी एक गंभीर घोटाळा समोर आला आहे. परीक्षा उत्तीर्ण न होताच प्रमाणपत्रे वाटली जात असल्याचे उघड झाले असून यामागे एक संघटित रॅकेट काम करत होते.
महाराष्ट्र सायबर पोलिसांनी या रॅकेटचा पर्दाफाश केला आहे. परदेशातून वैद्यकीय शिक्षण घेतलेल्या विद्यार्थ्यांना भारतात डॉक्टर म्हणून नोंदणी मिळवण्यासाठी FMGE म्हणजे फॉरेन मेडिकल ग्रॅज्युएट एक्झामिनेशन उत्तीर्ण होणे अनिवार्य आहे. मात्र काही परदेशी वैद्यकीय पदवीधरांकडे परीक्षा न देताच वैद्यकीय नोंदणी प्रमाणपत्रे असल्याचे तपासात समोर आले. महाराष्ट्र मेडिकल काऊन्सिलने तक्रार केल्यानंतर सायबर पोलिसांनी तांत्रिक विश्लेषण, डिजिटल रेकॉर्ड आणि सिस्टम लॉग तपासून आरोपींचा शोध घेतला.
या प्रकरणात आतापर्यंत तीन आरोपींना अटक करण्यात आली आहे. बुलढाणा जिल्ह्यातील वरुण प्रतापराव आखाडे (२८) आणि संकेत प्रभाकर उन्हाळे (२६) हे दोघे स्वतः परदेशातून एमबीबीएस झालेले अर्जदार आहेत. त्यांनी FMGE न उत्तीर्ण होतानाही वैद्यकीय नोंदणी प्रमाणपत्र मिळवल्याचा आरोप आहे. डिजिटल आणि आर्थिक व्यवहारांच्या तपासातून नाशिकमधील राहुल गोपाळ पाटील (३५) याचाही शोध लागला. तो आंतरराज्यीय टोळीतील महत्त्वाचा ऑपरेटर असल्याचा संशय आहे.
प्राथमिक तपासात राहुल पाटीलने सुमारे १५ ते २० अर्जदारांसाठी बनावट FMGE स्कोअरकार्ड, प्रमाणपत्रे आणि इतर कागदपत्रे तयार करून दिल्याचे समोर आले आहे. पैसे घेऊन बनावट कागदपत्रे पुरवल्याचा त्याच्यावर आरोप आहे. आंतरराज्यीय नेटवर्कद्वारे ही फसवणूक चालत होती, असे पोलिसांचे म्हणणे आहे. यामुळे वैद्यकीय क्षेत्रातील विश्वासार्हतेला धक्का बसला आहे.
या घोटाळ्याने राज्यात खळबळ उडाली आहे. एमपीएससी पेपरफुटी आणि या बनावट प्रमाणपत्र प्रकरणामुळे परीक्षा प्रणाली आणि नोंदणी प्रक्रियेवर प्रश्नचिन्ह निर्माण झाले आहे. पुढील तपास आणि कारवाई कशा प्रकारे होते, हे सर्वांच्या लक्ष्यात आहे. नागरिकांना विश्वासार्ह व्यवस्थेची अपेक्षा आहे.
