शिक्षक असल्याचा कौतुभ गावडेंचा दावा; सचिन सानप यांचे प्रत्युत्तर, नवा वाद रंगण्याची शक्यता
गावडे यांनी स्वत:ची गाडी रस्त्यातच थांबवून सानप यांची भेट घेतली. तसेच शिक्षकांच्या प्रश्नांसाठी कार्यकर्ता म्हणून आम्ही सदैव लढू, असे म्हणत निवडणुकीसाठी सानप यांना शुभेच्छा दिल्या. यावेळी सानप यांच्या कार्यकर्त्यांनी शिक्षकांचा आमदार शिक्षकच हवा अशा जोरदार घोषणा दिल्या. त्यावर कौस्तुभ गावडे यांनी 'शिक्षकच आहे मी'' असेच सांगितले. त्यामुळे कौस्तुभ गावडे खरंच शिक्षक आहेत का ? असा प्रश्न आता निर्माण झाला आहे.
Eduvarta
एज्युवार्ता न्यूज नेटवर्क
पुणे शिक्षक मतदार संघातून निवडणूक अर्ज भरण्यासाठी आलेले भारतीय जनता पक्षाचे अधिकृत उमेदवार कौस्तुभ गावडे यांनी 'शिक्षकांचा आमदार शिक्षकच हवा' ही टॅगलाईन घेऊन निवडणुकीच्या रिंगणात उतरलेले प्रा.सचिन सानप यांना निवडणुकीसाठी शुभेच्छा दिल्या. तसेच 'मी शिक्षकच आहे' असा दावा गावडे यांनी केला. मात्र, त्यावर सचिन सानप यांनी प्रसारमाध्यमांशी बोलताना ऐनवेळी शिक्षक असल्याचे सोंग घेतले तर ते अंगलट येऊ शकते. तसेच शिक्षक कोण आणि संस्थाचालक कोण ? हे शिक्षक ओळखतात, असेही सानप म्हणाले, त्यामुळे पुढील काळात याच मुद्द्यावर निवडणुक रंगणार असल्याची शक्यता निर्माण झाली आहे.
शिक्षक व पदवीधर निवडणुकीच्या रणधुमाळीला सुरुवात झाली असून सोमवारी पुणे शिक्षक मतदार संघातून निवडणूक लढवण्यास इच्छुक असलेल्या उमेदवारांनी अर्ज दाखल केले. भारतीय जनता पक्षाचे अधिकृत उमेदवार कौस्तुभ गावडे यांनी सकाळीच उमेदवारी अर्ज दाखल केला. दुपारी वाडिया महाविद्यालयातून शेकडो शिक्षक व समर्थकांसह भव्य रॅली काढून पाई निवडणुकीचा अर्ज भरण्यास प्रा.सचिन सानप जात होते. गावडे हे त्याचवेळी त्या रस्त्याने चालले होते. गावडे यांनी स्वत:ची गाडी रस्त्यातच थांबवून सानप यांची भेट घेतली. तसेच शिक्षकांच्या प्रश्नांसाठी कार्यकर्ता म्हणून आम्ही सदैव लढू, असे म्हणत निवडणुकीसाठी सानप यांना शुभेच्छा दिल्या. यावेळी सानप यांच्या कार्यकर्त्यांनी शिक्षकांचा आमदार शिक्षकच हवा अशा जोरदार घोषणा दिल्या. त्यावर कौस्तुभ गावडे यांनी 'शिक्षकच आहे मी'' असेच सांगितले. त्यामुळे कौस्तुभ गावडे खरंच शिक्षक आहेत का ? असा प्रश्न आता निर्माण झाला आहे.
प्रा. सचिन सानप हे सुरुवातीपासूनच शिक्षकांचा आमदार शिक्षक हवा ही भूमिका घेऊन निवडणुकीच्या रिंगणात उतरण उतरले. तसेच पाच जिल्ह्यात आणि 56 तालुक्यात भारतीय जनता पक्षाला एकही शिक्षक उमेदवार निवडणुकीसाठी मिळाला नाही, अशी टीका करत आहेत. त्यातच आज निवडणूक अर्ज भरण्यास जात असताना गावडे यांनी सानप यांची भेट घेतली. त्यावेळी मी शिक्षकच आहे, असे त्यांनी सांगितले.
उमेदवारी अर्ज दाखल करण्यासाठी विभागीय आयुक्त कार्यालयात आल्यावर माध्यमांशी बोलताना सचिन सानप म्हणाले, "कोणत्या शिक्षणा संस्थेत कोण शिक्षक आहे, हे सर्व शिक्षक जाणतात. ऐनवेळी शिक्षक असल्याचे सोंग आणल्यास ते अंगलट येऊ शकते. शिक्षकांना व प्रशासनाला माहित आहे, शिक्षक कोण आहे आणि संस्थाचालक कोण आहे." त्यामुळे हा मुद्दा पुढील काळात चर्चिला जाऊ शकतो.
