MES गरवारे कॉलेज: पंडित दीनदयाळ उपाध्याय रोजगार महाकुंभात २९ उमेदवारांची निवड
या रोजगार मेळाव्याचे उद्घाटन सावित्रीबाई फुले पुणे विद्यापीठाच्या नवोपक्रम, उद्योजकता, इनक्युबेशन व उद्योग-संलग्नता विभागाचे संचालक प्रा. (डॉ.) देविदास गोल्हार, जनसेवा सहकारी बँकेचे अध्यक्ष डॉ. राजेंद्र हिरेमठ आणि महाराष्ट्र एज्युकेशन सोसायटीचे संचालक श्री. विजय भालेराव यांच्या प्रमुख उपस्थितीत करण्यात आले.
Eduvarta
0
एज्युवार्ता न्यूज नेटवर्क
सावित्रीबाई फुले पुणे विद्यापीठ आणि मएसो सिनियर कॉलेज यांच्या संयुक्त विद्यमाने आयोजित ‘पंडित दीनदयाळ उपाध्याय रोजगार महाकुंभ – महाराष्ट्र’ हा भव्य रोजगार मेळावा नुकताच मएसो सिनियर कॉलेज येथे अत्यंत उत्साहात आणि यशस्वीरीत्या संपन्न झाला. या रोजगार मेळाव्यास तरुण-तरुणींचा उत्स्फूर्त प्रतिसाद मिळाला.
या रोजगार मेळाव्याचे उद्घाटन सावित्रीबाई फुले पुणे विद्यापीठाच्या नवोपक्रम, उद्योजकता, इनक्युबेशन व उद्योग-संलग्नता विभागाचे संचालक प्रा. (डॉ.) देविदास गोल्हार, जनसेवा सहकारी बँकेचे अध्यक्ष डॉ. राजेंद्र हिरेमठ आणि महाराष्ट्र एज्युकेशन सोसायटीचे संचालक श्री. विजय भालेराव यांच्या प्रमुख उपस्थितीत करण्यात आले.
मेळाव्यात विविध क्षेत्रातील अग्रगण्य कंपन्यांनी सहभाग घेतला होता. यामध्ये Teja Hospitality, Shakham Inc., Crazy Cheesy Enterprises, WeAgile Software Solutions Pvt. Ltd., Airattix Storage Pvt. Ltd., Hovers, Mehta Tools and Machinery, Bajaj Life Insurance, Media Vidya, Fortune Agri Equipment Pvt. Ltd. आणि Tech Mark Automation and Controls यांसारख्या नामांकित कंपन्यांचा समावेश होता.
रोजगार मेळाव्यादरम्यान आलेल्या अर्जांमधून प्राथमिक फेरीत निवड झालेल्या ११० उमेदवारांच्या प्रत्यक्ष मुलाखती (Interviews) पार पडल्या. या मुलाखतींच्या आधारे विविध कंपन्यांनी गुणवत्तेनुसार २९ उमेदवारांची विविध पदांसाठी अंतिम निवड केली.
या रोजगार मेळाव्यामुळे विद्यार्थी, पदवीधर आणि रोजगाराच्या शोधात असलेल्या युवकांना विविध उद्योग व कंपन्यांच्या प्रतिनिधींशी थेट संवाद साधण्याची मोठी संधी मिळाली. तसेच, युवकांना त्यांच्या शैक्षणिक पात्रतेनुसार आणि कौशल्यांनुसार योग्य त्या रोजगाराच्या संधी उपलब्ध झाल्याने उपस्थितांनी समाधान व्यक्त केले. हा मेळावा पुणे परिसरातील नोकरी इच्छुक तरुणांसाठी अत्यंत लाभदायी ठरला आहे.
