सारथी संस्थेला २०२६-२७ साठी १२२ कोटींचा निधी मंजूर; सरकारचा मोठा निर्णय
मराठा समाजातील विद्यार्थ्यांच्या भविष्यासाठी राज्य सरकारने मोठा निर्णय घेतला आहे. सन २०२६-२७ या आर्थिक वर्षासाठी सारथी संस्थेला सुमारे १२२ कोटींचा निधी मंजूर करण्यात आला आहे. या निधीचा उपयोग मराठा समाजातील विद्यार्थ्यांच्या शिक्षण, कौशल्यविकास, स्पर्धा परीक्षा मार्गदर्शन आणि रोजगाराच्या संधी उपलब्ध करून देण्यासाठी केला जाणार आहे.
Eduvarta
एज्युवार्ता न्यूज नेटवर्क
मराठा समाजातील विद्यार्थ्यांच्या भविष्यासाठी राज्य सरकारने मोठा निर्णय घेतला आहे. सन २०२६-२७ या आर्थिक वर्षासाठी सारथी संस्थेला सुमारे १२२ कोटींचा निधी मंजूर करण्यात आला आहे. या निधीचा उपयोग मराठा समाजातील विद्यार्थ्यांच्या शिक्षण, कौशल्यविकास, स्पर्धा परीक्षा मार्गदर्शन आणि रोजगाराच्या संधी उपलब्ध करून देण्यासाठी केला जाणार आहे. सारथी संस्थेच्या माध्यमातून होणाऱ्या विविध योजना अधिक प्रभावी आणि व्यापक होतील, असा विश्वास सरकारकडून व्यक्त करण्यात आला आहे.
मराठा समाजातील युवकांना सामाजिक आणि आर्थिक प्रगती साधण्यासाठी आरक्षण हे एक महत्त्वाचे साधन आहे. मात्र केवळ आरक्षण पुरेसे नाही. त्यासोबतच दर्जेदार शिक्षण, व्यावसायिक प्रशिक्षण, कौशल्यवृद्धी आणि रोजगारक्षम क्षमता निर्माण करणेही तितकेच आवश्यक आहे. सारथी संस्थेने याच दिशेने सातत्याने काम सुरू ठेवले आहे. संस्थेच्या विविध उपक्रमांमुळे अनेक विद्यार्थ्यांना स्पर्धा परीक्षा, उच्च शिक्षण आणि कौशल्य आधारित प्रशिक्षणांमध्ये सहभागी होण्याची संधी मिळत आहे. नव्याने मंजूर झालेल्या निधीमुळे या कामांना आणखी गती आणि विस्तार मिळेल, असे सांगण्यात आले आहे.
मराठा आरक्षण उपसमितीच्या माध्यमातून समाजातील विविध समस्यांवर काम करताना विद्यार्थी आणि युवकांच्या भवितव्याला नेहमीच केंद्रस्थानी ठेवण्यात आले आहे. शिक्षण आणि कौशल्यविकास हेच दीर्घकालीन समाधान असल्याचे मत या उपसमितीने वेळोवेळी व्यक्त केले आहे. सारथी संस्थेला मिळालेला हा निधी म्हणजे त्याच भूमिकेची पुष्टी आहे. या निधीच्या प्रभावी वापराने मराठा समाजातील तरुण पिढीला अधिक सक्षम बनवता येईल आणि त्यांना स्पर्धात्मक जगात टिकून राहण्यासाठी आवश्यक ते आधार मिळेल, असा विश्वास व्यक्त करण्यात आला आहे.
हा निर्णय मराठा समाजाच्या शैक्षणिक आणि आर्थिक उन्नतीच्या दिशेने टाकलेले एक महत्त्वाचे पाऊल मानले जात आहे. सारथी संस्थेच्या माध्यमातून होणारे काम आता अधिक व्यापक आणि प्रभावी होईल, अशी अपेक्षा आहे. विद्यार्थी आणि युवकांना शिक्षण, कौशल्य आणि रोजगाराच्या संधी उपलब्ध करून देण्यासाठी हा निधी निश्चितच उपयुक्त ठरेल, आणि विद्यार्थ्यांच्या आवश्यक त्या गरजा पूर्ण होतील असे सांगितले जात आहे.
