MPSC : वयोमर्यादेत शिथिलता, पात्र उमेदवारांना ६ जानेवारीपर्यंत अर्जासाठी मुदत
महाराष्ट्र लोकसेवा आयोगातर्फे घेतल्या जाणाऱ्या शासन सेवेतील परीक्षेसाठी विहित कमाल वयोमर्यादेत एक वर्षाची शिथिलता देण्यात आली आहे. त्यामुळे वयोमर्यादेत पात्र ठरलेल्या उमेदवारांना अर्ज भरण्याची संधी मिळणार असून, त्यांना ६ जानेवारीपर्यंत अर्ज भरता येणार आहे.
eduvarta@gmail.com 
एज्युवार्ता न्यूज नेटवर्क
महाराष्ट्र लोकसेवा आयोगातर्फे (MPSC) घेतल्या जाणाऱ्या शासन सेवेतील परीक्षेसाठी विहित कमाल वयोमर्यादेत एक वर्षाची शिथिलता (One year extension in age limit) देण्यात आली आहे. त्यामुळे महाराष्ट्र गट-ब (अराजपत्रित) सेवा संयुक्त पूर्व परीक्षा आणि महाराष्ट्र गट-क सेवा संयुक्त पूर्व परीक्षेसाठी (Group-B and Group-C Services Combined Preliminary Examination) वयोमर्यादेत पात्र ठरलेल्या उमेदवारांना अर्ज करण्याची संधी मिळणार असून त्यांना ६ जानेवारीपर्यंत अर्ज भरता (Fill out the application by January 6th) येणार आहे.
राज्यात मागास वर्गासाठी राज्य शासकीय सेवेतील पदांवर नियुक्तीसाठी आरक्षणाची तरतूद करण्यात आली आहे. या अधिसूचनेतील तरतुदीच्या अंमलबजावणीच्या अनुषंगाने शासनामार्फत पदसंख्या आणि आरक्षण नमूद करून सुधारित मागणीपत्रे एमपीएससीला देण्यात आली होती. त्यानुसार एमपीएससीने जाहिराती प्रसिद्ध केल्या होत्या. मात्र, एक वेळची विशेष बाब म्हणून वयोमर्यादा ओलांडलेल्या उमेदवारांना संधी देण्याचा निर्णय २० डिसेंबर रोजी घेण्यात आला.
या निर्णयाच्या अनुषंगाने एमपीएससीने प्रसिद्ध केलेल्या महाराष्ट्र गट-ब (अराजपत्रित) सेवा संयुक्त पूर्व परीक्षा २०२४ आणि महाराष्ट्र गट-क सेवा संयुक्त पूर्व परीक्षा २०२४ या संवर्गाच्या जाहिरातींस अनुसरून निश्चित केलेल्या कमाल वयोमर्यादेमध्ये एक वर्षाची शिथिलता देण्यात आली आहे.
६ जानेवारीपर्यंत करता येणार अर्ज
उमेदवारांना २६ डिसेंबर ते ६ जानेवारी या कालावधीत अर्ज करता येणार आहे. ऑनलाइन परीक्षा शुल्क भरण्यासाठी ६ जानेवारी ही अंतिम मुदत आहे. दोन्ही परीक्षांसाठी नव्याने अर्ज सादर करणाऱ्या उमेदवारांना केवळ अमरावती, छत्रपती संभाजीनगर, नागपूर, नाशिक, नवी मुंबई आणि पुणे या जिल्हा केंद्रांवरील परीक्षा उपकेंद्रांवर प्रवेश देण्यात येईल, असे प्रसिद्धीपत्रकात म्हटले आहे.
