शिक्षक,पदवीधर निवडणुकीत काँग्रेसची आघाडी; महायुतीचे उमेदवार केव्हा ठरणार?
पुणे शिक्षक मतदार संघातून निवडणूक लढण्यास प्रा.सचिन सानप, कौस्तुभ गावडे, दत्तात्रय सावंत, बी.पी रोंगे, नंदकुमार सागर, मंगेश चिवटे आदी उमेदवार इच्छुक आहेत. मात्र, यातील कोणत्याही उमेदवाराला कोणत्याच राजकीय पक्षाने अद्याप अधिकृत उमेदवारी जाहीर केली नाही. त्यामुळे आसगावकरांच्या विरोधात थेट लढत कोणात होणार याबाबतचे चित्र अद्याप स्पष्ट झालेले नाही.
Eduvarta
एज्युवार्ता न्यूज नेटवर्क
पुणे शिक्षक मतदार संघातून निवडणूक लढण्यासाठी काँग्रेस पक्षातर्फे जयंत आसगावकर यांना उमेदवारी जाहीर करण्यात आले आहे. त्यामुळे महाविकास आघाडीने उमेदवारी जाहीर करण्यात बाजी मारली असली तरी पदवीधर निवडणुकीसाठी अद्याप कोणाचेही नाव अंतिम झालेले नाही. त्यामुळे पुण्यातून कोणत्या उमेदवारांमध्ये थेट लढत होणार याबाबतचे चित्र अद्याप अस्पष्ट आहे.
पुणे शिक्षक मतदार संघातून निवडणूक लढण्यास प्रा.सचिन सानप, कौस्तुभ गावडे, दत्तात्रय सावंत, बी.पी रोंगे, नंदकुमार सागर, मंगेश चिवटे आदी उमेदवार इच्छुक आहेत. मात्र, यातील कोणत्याही उमेदवाराला कोणत्याच राजकीय पक्षाने अद्याप अधिकृत उमेदवारी जाहीर केली नाही. त्यामुळे आसगावकरांच्या विरोधात थेट लढत कोणात होणार याबाबतचे चित्र अद्याप स्पष्ट झालेले नाही. परंतु, यात प्रा.सचिन सानप यांचे पारडे जड असल्याचे बोलले जात आहे. तसेच दत्तात्रय सावंत हे सुद्धा चांगली लढत देऊ शकतात, अशी शिक्षण वर्तुळात चर्चा आहे.
पुणे पदवीधर मतदार संघातून भारतीय जनता पक्षाकडून शरद लाड यांना उमेदवारी मिळण्याची शक्यता आहे. परंतु, डी. वाय. पाटील यांच्या कुटुंबातील स्मिता जाधव यांना उमेदवारी देण्याबाबत भारतीय जनता पक्षाकडून चाचपणी केली जात आहे. स्मिता जाधव या उच्च शिक्षित असून नवा चेहरा म्हणून त्यांना पसंती मिळू शकते. तसेच मिलिंद संपगावकर हे सुद्धा भारतीय जनता पक्षाकडून उमेदवारी मिळण्याबाबत प्रयत्नशील आहेत.
अजित पवार गट राष्ट्रवादी काँग्रेस पक्षाकडून निवडणूक लढण्यास भैय्या माने इच्छुक असून पक्षाने उमेदवारी नाही दिली तरी अपक्ष निवडणूक लढणार असल्याचे त्यांनी स्पष्ट केले आहे. मात्र, महाविकास आघाडीमध्ये राष्ट्रवादी काँग्रेस शरद पवार गटाला पदवीधरची जागा मिळाली आहे. या जागेवर माजी आयएएस अधिकारी प्रभाकर देशमुख यांच्या कन्या हर्षदा देशमुख या निवडणूक लढण्यास इच्छुक आहेत. त्या उच्चशिक्षित असून रयत शिक्षण संस्थेच्या बॉडीवर आहेत. त्यामुळे देशमुख यांना पक्षाकडून संधी मिळू शकते.सध्या पक्षात हर्षदा देशमुख यांच्या नावाबाबत जोरदार चर्चा आहे. हर्षदा देशमुख या देखील उच्चशिक्षित असून उच्च शिक्षित उमेदवार म्हणून त्यांचा विचार केला जाऊ शकतो. तसेच पदवीधरसाठी शिवाजी खांडेकर उमेदवारीसाठी प्रयत्न करत आहेत.
