रेल्वेमध्ये सरकारी नोकरीची सुवर्णसंधी; आरआरबी अंतर्गत १,६८८ पदांसाठी भरती प्रक्रिया सुरू
रेल्वे भरती बोर्डाने RRB नॉन-टेक्निकल पाॅप्युलर कॅटेगरी अंडरग्रॅज्युएट लेव्हलची शॉर्ट नोटिफिकेशन जारी केली आहे. या माध्यमातून देशभरातील विविध रेल्वे झोनमध्ये एकूण १ हजार ६८८ रिक्त पदे भरली जाणार आहेत.
Eduvarta
एज्युवार्ता न्यूज नेटवर्क
रेल्वे भरती बोर्डाने (RRB) नॉन-टेक्निकल पाॅप्युलर कॅटेगरी अंडरग्रॅज्युएट लेव्हलची शॉर्ट नोटिफिकेशन जारी केली आहे. या माध्यमातून देशभरातील विविध रेल्वे झोनमध्ये एकूण १ हजार ६८८ रिक्त पदे भरली जाणार आहेत. अर्ज प्रक्रिया १५ ऑक्टोबरपासून सुरू होईल आणि उमेदवारांना १३ नोव्हेंबर रात्री ११:५९ वाजेपर्यंत ऑनलाइन अर्ज करता येईल. सविस्तर जाहिरात १४ ऑक्टोबर रोजी प्रकाशित होईल. या भरतीमुळे हजारो तरुणांना रेल्वेमध्ये स्थिर करिअरची संधी मिळणार आहे.
या भरतीत चार प्रकारच्या पदांचा समावेश आहे. ट्रेन क्लर्कसाठी १८८, कमर्शियल कम तिकीट क्लर्कसाठी ७००, अकाउंट्स क्लर्क कम टायपिस्टसाठी २०० आणि ज्युनियर क्लर्क कम टायपिस्टसाठी ६०० जागा निश्चित करण्यात आल्या आहेत. पात्रतेसाठी कोणत्याही मान्यताप्राप्त बोर्डातून बारावी उत्तीर्ण असणे आवश्यक आहे. अकाउंट्स व ज्युनियर क्लर्क पदांसाठी संगणकावर हिंदी किंवा इंग्रजी टायपिंगचे ज्ञानही हवे. वयोमर्यादा १ जानेवारी २०२७ रोजी १८ ते ३० वर्षे राहील. आरक्षित प्रवर्गातील उमेदवारांना सरकारी नियमांनुसार वयात सूट मिळेल.
अर्ज करण्यासाठी उमेदवारांनी आरआरबीच्या अधिकृत पोर्टलवर किंवा संबंधित प्रादेशिक संकेतस्थळावर नवीन नोंदणी करावी. त्यानंतर लॉगिन करून वैयक्तिक व शैक्षणिक माहिती भरावी, छायाचित्र-स्वाक्षरी व प्रमाणपत्रे अपलोड करावीत आणि फी भरून अर्ज सादर करावा. जनरल व ओबीसी उमेदवारांसाठी अर्ज शुल्क ५०० रुपये तर एससी, एसटी, माजी सैनिक, महिला, दिव्यांग, ट्रान्सजेंडर, अल्पसंख्याक व आर्थिकदृष्ट्या दुर्बल प्रवर्गासाठी २५० रुपये आहे. सीबीटी-१ परीक्षेला बसलेल्या जनरल-ओबीसी उमेदवारांना बँक शुल्क वजा जाता ४०० रुपये परत मिळतील तर सवलतीच्या प्रवर्गाला पूर्ण २५० रुपये परत मिळतील. अर्ज सादर केल्यानंतर त्याची प्रत जपून ठेवावी.
निवड प्रक्रिया अनेक टप्प्यांची आहे. पहिल्या टप्प्यात सीबीटी-१ परीक्षा होईल ज्यात १०० प्रश्न ९० मिनिटांत सोडवावे लागतील. यात सामान्य जाण ४०, गणित ३० आणि बुद्धिमत्ता-तर्क ३० प्रश्न असतील. पात्र उमेदवारांसाठी सीबीटी-२ मध्ये १२० प्रश्न असतील ज्यात सामान्य जाण ५०, गणित ३५ व तर्क ३५ प्रश्न येतील. टायपिंग आवश्यक असलेल्या पदांसाठी कौशल्य चाचणी घेतली जाईल. शेवटी कागदपत्र पडताळणी व वैद्यकीय तपासणी होईल. इच्छुक उमेदवारांनी अधिकृत संकेतस्थळावरून नियमित अद्यतने तपासावीत.
