फ्रान्समध्ये विद्यार्थ्यांचा शेकडो शाळांवर ताबा, आंदोलनाला हिंसक वळण; 40 मुख्याध्यापकांसह अनेकजण जखमी
फ्रान्समधील सार्वजनिक शिक्षण व्यवस्थेतील गंभीर त्रुटी, शाळांची दयनीय अवस्था आणि मूलभूत सुविधांच्या अभावामुळे विद्यार्थ्यांमध्ये प्रचंड असंतोष निर्माण झाला आहे. देशभरातील शेकडो शाळांमध्ये विद्यार्थ्यांनी टाळे ठोकून शाळांचा ताबा घेतला असून रस्त्यावर उतरून सरकारविरोधात जोरदार आंदोलन सुरू केले आहे.
Eduvarta
एज्युवार्ता न्यूज नेटवर्क
फ्रान्समधील सार्वजनिक शिक्षण व्यवस्थेतील गंभीर त्रुटी, शाळांची दयनीय अवस्था आणि मूलभूत सुविधांच्या अभावामुळे विद्यार्थ्यांमध्ये प्रचंड असंतोष निर्माण झाला आहे. देशभरातील शेकडो शाळांमध्ये विद्यार्थ्यांनी टाळे ठोकून शाळांचा ताबा घेतला असून रस्त्यावर उतरून सरकारविरोधात जोरदार आंदोलन सुरू केले आहे. गेल्या काही महिन्यांतील हे सर्वात मोठे विद्यार्थी आंदोलन ठरले आहे. अनेक शहरांमध्ये पोलीस आणि आंदोलकांमध्ये चकमकी झाल्यामुळे परिस्थिती तणावपूर्ण बनली आहे. हिंसाचार आणि रस्ते अडवल्याप्रकरणी पोलिसांनी शेकडो विद्यार्थ्यांना ताब्यात घेतले आहे.
शांततापूर्ण पद्धतीने सुरू झालेल्या या आंदोलनाला काही भागांत हिंसक वळण लागले. चकमकींमध्ये ४० मुख्याध्यापकांसह एकूण ६५ जण जखमी झाले आहेत. आंदोलक विद्यार्थ्यांनी मांडलेले मुद्दे रास्त असल्याचे प्रशासनाने स्पष्ट केले आहे. परिस्थिती संवेदनशीलतेने हाताळण्याचे आश्वासन देतानाच हिंसाचार आणि सार्वजनिक मालमत्तेचे नुकसान करणाऱ्यांवर कडक कारवाईचा इशाराही दिला आहे.
सरकारी शिक्षण व्यवस्थेकडे झालेल्या दीर्घकाळाच्या दुर्लक्षामुळे विद्यार्थी आणि शिक्षकांमध्ये तीव्र संताप आहे. अनेक शाळांच्या इमारती खचलेल्या अवस्थेत आहेत. छताची गळती, पाण्याची गंभीर समस्या आणि आवश्यक दुरुस्त्या अनेक महिने खोळंबल्या आहेत. त्याचबरोबर वर्गांमध्ये क्षमतेपेक्षा जास्त विद्यार्थी बसवले जात असल्याने शिक्षणाचा दर्जा घसरत आहे.
शिक्षकांची मोठी टंचाईही या आंदोलनाचे मुख्य कारण आहे. शाळांमध्ये शिक्षकांची भरती प्रलंबित असल्याने उपस्थित शिक्षकांवर कामाचा प्रचंड ताण आहे. शिक्षकांचे वेतन अपुरे असल्याचा आरोपही विद्यार्थी आणि शिक्षक संघटनांकडून केला जात आहे. या सर्व समस्यांमुळे फ्रान्सच्या शिक्षण व्यवस्थेसमोर मोठे आव्हान निर्माण झाले असून सरकारला तातडीने ठोस पावले उचलावी लागणार आहेत.
