SPPU : विद्यापीठ चालतंय कंत्राटी प्राध्यापकांवर ? १३३ पदांच्या भरतीची जाहिरात प्रसिद्ध
विद्यापीठातील विभागांमधील विविध विषयांसाठी १३३ सहाय्यक प्राध्यापकांच्या भरतीची प्रक्रिया सुरू केली आहे. त्यामध्ये सर्वाधिक ५१ पदे विज्ञान व तंत्रज्ञान विद्याशाखेसाठी भरली जाणार आहेत.
eduvarta@gmail.com 
एज्युवार्ता न्यूज नेटवर्क
सावित्रीबाई फुले पुणे विद्यापीठाने (SPPU) सहाय्यक प्राध्यापकांच्या (Assistant Professor) भरतीची जाहिरात काढली आहे. त्यानुसार विविध विभागांत १३३ प्राध्यापक कंत्राटी तत्वावर घेण्यात येणार आहेत. शासनाकडून विद्यापीठाला पूर्णवेळ प्राध्यापक भरतीसाठी अद्याप मान्यता मिळालेली नाही. त्यामुळे कंत्राटी प्राध्यापकांवर अवलंबून राहावे लागत असल्याची स्थिती आहे. विद्यापीठाला आपल्या फंडातून त्याचा खर्च भागावावा लागत असल्याने आर्थिक बोजा पडत असून पूर्णवेळ प्राध्यापक नसल्याने अध्यापनासह संशोधनाच्या कामांवरही परिणाम होत आहे. (Assistant Professor recruitment in Savitribai Phule Pune University)
विद्यापीठातील विविध विषयांसाठी १३३ सहाय्यक प्राध्यापकांच्या भरतीची प्रक्रिया सुरू केली आहे. त्यामध्ये सर्वाधिक ५१ पदे विज्ञान व तंत्रज्ञान विद्याशाखेसाठी भरली जाणार आहेत. त्याखालोखाल आंतरविद्याशाखीय विद्याशाखेसाठी ३८, मानव्यविज्ञानसाठी ३४ आणि वाणिज्य व व्यवस्थापनविद्याशाखे सहा प्राध्यापकांची भरती केली जाणार आहे. तर स्पर्धा परीक्षा केंद्रासाठी चार सहाय्यक प्राध्यापकांना घेतले जाणार आहे.
सावित्रीबाई फुले पुणे विद्यापीठाच्या प्र-कलगुरूंच्या नावाची घोषणा २२ जुलैला?
ही भरती कंत्राटी पध्दतीने केली जाणार असून त्याचा कालावधी ३१ मे २०२४ पर्यंत असणार आहे. म्हणजे या प्राध्यापकांना पूर्ण एक वर्षाचा कालावधीही मिळत नाही. मागील वर्षी दिवाळीनंतर कंत्राटी प्राध्यापकांना रुजू करून घेण्यात आले होते. त्यांना केवळ नऊ महिन्यांचा कालावधी मिळाला होता. पैसे वाचविण्यासाठी विद्यापीठाने उशिरा नियुक्ती केल्याची चर्चा विद्यापीठात रंगली होती.
विद्यापीठाला विविध विभागांमध्ये सहाय्यक प्राध्यापकांची १११ पदे भरण्याची मंजूरी मिळणे अपेक्षित आहे. पण अद्याप शासनाकडून त्यावर शिक्कामोर्तब करण्यात आलेले नाही. मागील काही वर्षांत प्राध्यापक भरती होऊ शकलेली नाही. त्यामुळे विद्यापीठाला आपल्या फंडातून कंत्राटी प्राध्यापकांचे वेतन द्यावे लागत आहे. परिणामी, विद्यापीठावरील आर्थिक बोजा वाढत आहे. अनेक विभागांमध्ये प्राध्यापकांची संख्या खूपच कमी असल्याने अध्यापनावर आणि संशोधनाच्या कामांवरही परिणाम होत आहे. त्याचा फटका विद्यापीठाला राष्ट्रीय व आंतरराष्ट्रीय पातळीवर विविध रँकिंगमध्ये बसत असल्याचे दिसून आले आहे.
SPPU News : विद्यापीठातील अनेक विभाग पडणार ओस, २५ अभ्यासक्रमांना जागांपेक्षा कमी अर्ज
अशी होईल भरती प्रक्रिया
उमेदवारांना विद्यापीठाकडे १३ ते २० जुलै यादरम्यान ऑनलाईन अर्ज करता येणार आहे. त्यानंतर मुलाखतींद्वारे निवड केली जाणार आहे. या पदासाठी विद्यापीठाकडून ४० हजार रुपये वेतन दिले जाईल. पदव्युत्तर पदवीमध्ये किमान ५५ टक्के गुण आणि सेट, नेट किंवा पीएचडी पदवी असलेले उमेदवार पात्र ठरतील. युजीसीच्या नियमांप्रमाणे इतर सवलतीही लागू असणार आहेत. याबाबत विद्यापीठाच्या जाहिरातीमध्ये सविस्तर माहिती देण्यात आली आहे. उमेदवारांना https://admin.unipune.ac.in/recruitment/ या संकेतस्थळावर अधिक माहिती मिळेल.
विद्याशाखानिहाय पदसंख्या –
विज्ञान व तंत्रज्ञान – ५१
आंतरविद्याशाखीय अभ्यास - ३८
मानव्यविज्ञान – ३४
वाणिज्य व व्यवस्थापन – ६
स्पर्धा परीक्षा केंद्र – ४
शैक्षणिक बातम्यांचे अपडेट मिळविण्यासाठी व्हॉट्सअप ग्रुपमध्ये सहभागी व्हा.
