SPPU विद्यापीठाचे संकेतस्थळ बंद; परीक्षा रद्द करण्याची वेळ?

एज्युवार्ता न्यूज नेटवर्क 

सावित्रीबाई फुले पुणे विद्यापीठाचे संकेतस्थळ पहाटे पाच वाजल्यापासून बंद असून विद्यापीठाशी निगडीत असलेली सर्व शैक्षणिक कामे ठप्प झाली आहेत. डोमेन संदर्भातील तांत्रिक कारणांमुळे संकेतस्थळ बंद असल्याचे सूत्रांकडून सांगितले जात आहे.मात्र, यामुळे विद्यापीठाच्या परीक्षा विभागातर्फे घेतल्या जाणाऱ्या पूर्वनियोजित परीक्षा रद्द करण्याची वेळ विद्यापीठावर आली आहे. परंतु, त्यासंदर्भातील कोणतीही अधिकृत माहिती विद्यापीठाने दिलेली नाही.विद्यापीठाकडून ही तांत्रिक अडचण दूर करण्याचा प्रयत्न केला जात असून लवकरच विद्यापीठाचे unipune.ac.in हे संकतस्थळ सुरू होईल,अशी माहिती संबंधित अधिकाऱ्यांकडून दिली जात आहे. 

विद्यापीठाच्या संकेतस्थळाला भेट देणाऱ्या विद्यार्थी, प्राध्यापक व संशोधकांची संख्या मोठी आहे.विद्यापीठाच्या संकेतस्थळावरून शैक्षणिक संस्थांना विविध मेल पाठवले जातात. तसेच परीक्षा विभागाकडून घेतल्या जाणाऱ्या परीक्षांच्या प्रश्नपत्रिका सुध्दा पाठवल्या जातात.मात्र, सकाळपासून साईट बंद असल्याने विद्यापीठाला कोणतेही काम करता येत नाही. परिणामी विद्यापीठाशी निगडीत असलेली सर्व शैक्षणिक कामे सध्या ठप्प पडली आहेत.विद्यापीठ कॅम्पसमध्ये बेवसाईट चालू असल्याचे दिसत असले तरी इतर ठिकाणी वेबसाईट ओपन होत नाही. 

विद्यापीठाचे डोमेन ज्या शासकीय यंत्रणेकडून घेतले आहे. त्याच ठिकाणाहून ही अडचण येत असल्याचे अधिकाऱ्यांकडून सांगितले जात आहे.तसेच शनिवारी संबंधित शासकीय अधिकारी सुट्टीवर असल्याने याबाबत दूरध्वनीवरून संवाद साधून हा प्रश्न मार्गी लागत नसल्याचे बोलले जात आहे.त्यामुळे संकेतस्थळ केव्हा सुरू होणार हा प्रश्न अनुत्तरीत आहे.