राष्ट्रीय शिक्षक पुरस्कार जाहीर : महाराष्ट्रातील चार शिक्षकांचा समावेश
राष्ट्रीय शिक्षक पुरस्कार २०२६: नाविन्यपूर्ण अध्यापन, विद्यार्थी विकास आणि सामाजिक बांधिलकीसाठी ४८ शिक्षकांची निवड; यात महाराष्ट्रातील चार शिक्षकांचा समावेश.
Eduvarta
एज्युवार्ता न्यूज नेटवर्क
देशभरातील ४८ शिक्षकांना राष्ट्रीय शिक्षक पुरस्कार २०२६ साठी निवडण्यात आले असून त्यात महाराष्ट्रातील चार शिक्षकांचा समावेश आहे. विद्यार्थ्यांच्या शैक्षणिक प्रगतीसोबत व्यक्तिमत्त्व विकासाला चालना देणाऱ्या आणि नावीन्यपूर्ण उपक्रम राबविणाऱ्या या शिक्षकांचा गौरव शिक्षक दिनानिमित्त ५ सप्टेंबर रोजी नवी दिल्लीतील विज्ञान भवन येथे राष्ट्रपती द्रौपदी मुर्मू यांच्या हस्ते होणार आहे. केंद्रीय शिक्षण मंत्रालयाच्या शालेय शिक्षण व साक्षरता विभागामार्फत हा पुरस्कार दिला जातो.
या पुरस्कारासाठी निवड करताना नावीन्यपूर्ण अध्यापन पद्धती, विद्यार्थ्यांची शैक्षणिक गुणवत्ता वाढवणे, व्यक्तिमत्त्व विकास, शाळेच्या सर्वांगीण प्रगतीसाठी केलेले प्रयत्न आणि सामाजिक बांधिलकी या निकषांचा विचार करण्यात आला. महाराष्ट्रातील निवडलेल्या शिक्षकांनी वंचित घटकांतील विद्यार्थ्यांना मुख्य प्रवाहात आणणे, डिजिटल शिक्षण, स्पर्धा परीक्षा मार्गदर्शन आणि नेतृत्व गुणांचा विकास याबाबत उल्लेखनीय काम केले आहे.
डॉ. कविता गिट्टे यांची पुरस्कारासाठी निवड झाली आहे. त्या महाराष्ट्रातील बीड जिल्ह्यातील केज येथील साने गुरुजी निवासी विद्यालयात काम करतात. दिव्यांग मुले, ऊसतोड कामगारांची मुले आणि इतर वंचित घटकांतील विद्यार्थ्यांना शिक्षणाच्या मुख्य प्रवाहात आणण्यासाठी त्यांनी उल्लेखनीय काम केले आहे. नाशिक महानगरपालिका शाळा क्रमांक १८ मध्ये कार्यरत असलेल्या कुंदा बच्छाव यांचाही सन्मान होणार आहे. त्यांनी शाळेचा शैक्षणिक दर्जा उंचावण्यासाठी अनेक अभिनव उपक्रम राबवले आहेत.
याशिवाय, पीएम श्री जवाहर नवोदय विद्यालय, लातूर येथे काम करणारे वैभव कुलकर्णी यांनाही हा पुरस्कार मिळणार आहे. त्यांनी ग्रामीण विद्यार्थ्यांसाठी स्पर्धा परीक्षा, विज्ञान-तंत्रज्ञान आणि कौशल्याधारित शिक्षणावर विशेष भर दिला आहे. तसेच सैनिक स्कूल, सातारा येथील शिवप्रसाद टिंगरे यांचीही निवड झाली आहे. विद्यार्थ्यांमध्ये शिस्त, नेतृत्वगुण आणि देशसेवेची भावना रुजविण्यासाठी त्यांनी महत्त्वपूर्ण योगदान दिले आहे.
राष्ट्रीय शिक्षक पुरस्कारासाठी यंदा जिल्हा, राज्य आणि राष्ट्रीय असे तीन टप्पे पार पाडण्यात आले. केंद्रीय शिक्षण मंत्रालयाच्या राष्ट्रीय पोर्टलवर १५ जून ते २० जुलै २०२६ दरम्यान पात्र शिक्षकांकडून ऑनलाइन स्व-नामांकन स्वीकारण्यात आले. विद्यार्थ्यांची प्रगती, नावीन्यपूर्ण अध्यापन, व्यक्तिमत्त्व विकास, शाळेची गुणवत्तावाढ आणि वंचित घटकांसाठीचे कार्य या आधारे अंतिम ४८ शिक्षकांची निवड झाली. ५ सप्टेंबर रोजी विज्ञान भवनात होणाऱ्या समारंभात पुरस्कारप्राप्त शिक्षकांच्या कार्याचे लघुपट दाखविले जातील. हा सोहळा दूरदर्शन, स्वयं प्रभा वाहिनी, वेबकास्ट आणि सोशल मीडियावर थेट प्रक्षेपित केला जाईल.
