दिवेआगर समुद्रात मोठी दुर्घटना; सहलीसाठी गेलेल्या ८ विद्यार्थ्यांचा बुडून मृत्यू
रायगड जिल्ह्यातील दिवेआगर समुद्रकिनारी सहलीसाठी आलेल्या विद्यार्थ्यांवर काळाने घाला घातला. समुद्रात पोहण्यासाठी गेलेल्या आठ विद्यार्थ्यांचा बुडून मृत्यू झाल्याची धक्कादायक घटना घडली आहे.
Eduvarta
एज्युवार्ता न्यूज नेटवर्क
रायगड जिल्ह्यातील दिवेआगर समुद्रकिनारी सहलीसाठी आलेल्या विद्यार्थ्यांवर काळाने घाला घातला. समुद्रात पोहण्यासाठी गेलेल्या आठ विद्यार्थ्यांचा बुडून मृत्यू झाल्याची धक्कादायक घटना घडली आहे. या दुर्घटनेमुळे विद्यार्थी, शिक्षक आणि पालकांमध्ये मोठी खळबळ उडाली आहे. मृत विद्यार्थी पुणे जिल्ह्यातील आळंदी येथील एका खासगी क्लासचे असल्याची माहिती समोर आली आहे.
मिळालेल्या माहितीनुसार, आळंदी येथील विनर्स ॲकॅडमी या खासगी क्लासच्या विद्यार्थ्यांची सहल दिवेआगर येथे आयोजित करण्यात आली होती. या सहलीत इयत्ता अकरावी आणि बारावीमध्ये शिक्षण घेणारे एकूण ४२ विद्यार्थी सहभागी झाले होते. यामध्ये २५ मुले आणि १७ मुलींचा समावेश होता. सहलीदरम्यान विद्यार्थी दिवेआगरच्या समुद्रकिनारी गेले असताना काही विद्यार्थी समुद्राच्या पाण्यात उतरले.
समुद्राच्या पाण्याचा अंदाज न आल्याने विद्यार्थ्यांचा तोल गेला आणि काही जण पाण्यात वाहून गेल्याची प्राथमिक माहिती आहे. या घटनेत आठ विद्यार्थ्यांचा बुडून मृत्यू झाल्याचे सांगण्यात येत आहे. दुर्घटनेची माहिती मिळताच स्थानिक नागरिक आणि संबंधित यंत्रणांनी बचावकार्य सुरू केले. घटनेनंतर समुद्रकिनारी मोठी गर्दी झाली असून, प्रशासनाकडून पुढील कार्यवाही केली जात आहे.
दरम्यान, या दुर्घटनेमुळे मृत विद्यार्थ्यांच्या कुटुंबीयांवर दुःखाचा डोंगर कोसळला आहे. एकत्र सहलीसाठी गेलेल्या विद्यार्थ्यांपैकी आठ जणांचा मृत्यू झाल्याने आळंदी परिसरातही हळहळ व्यक्त होत आहे. या घटनेची अधिकृत माहिती आणि दुर्घटनेमागील नेमकी परिस्थिती प्रशासनाच्या पुढील तपासातून स्पष्ट होणार आहे. विद्यार्थ्यांच्या सुरक्षेच्या दृष्टीने समुद्रकिनारी सहलीदरम्यान आवश्यक खबरदारी घेण्याचे महत्त्व या घटनेमुळे पुन्हा अधोरेखित झाले आहे.
