CET Cell : पाच वर्षीय विधी अभ्यासक्रमाच्या प्रवेश संस्थात्मक फेरीसाठी १० ऑक्टोबरपर्यंत मुदतवाढ
राज्य सामाईक प्रवेश परीक्षा कक्षाकडून पाच वर्षीय विधी अभ्यासक्रमाच्या प्रवेश प्रक्रियेत विद्यार्थ्यांच्या हितासाठी महत्वाचा निर्णय घेण्यात आला आहे.
Eduvarta
एज्युवार्ता न्यूज नेटवर्क
राज्य सामाईक प्रवेश परीक्षा कक्षाकडून पाच वर्षीय विधी अभ्यासक्रमाच्या प्रवेश प्रक्रियेत विद्यार्थ्यांच्या हितासाठी महत्वाचा निर्णय घेण्यात आला आहे. काही विद्यार्थ्यांनी प्रवेश अर्जामध्ये गुण किंवा इतर तपशील अनावधानाने चुकीचे नमूद केल्याने ते प्रवेशापासून वंचित राहण्याची शक्यता निर्माण झाली होती. उच्च न्यायालयाच्या निर्देशानुसारट आणि विद्यार्थ्यांचे नुकसान टाळण्याच्या उद्देशाने संस्थात्मक फेरी संपुष्टात आल्यानंतरही सीईटी कक्षाने अतिरिक्त संधी देण्याचा निर्णय घेतला आहे. यामुळे संस्थात्मक फेरी आता १० ऑक्टोबर २०२६ पर्यंत चालू राहणार आहे.
राज्यातील १६७ विधि महाविद्यालयांमध्ये एकूण १३ हजार ४१८ जागा उपलब्ध आहेत. आतापर्यंत यापैकी ११ हजार २१५ जागांवर प्रवेश पूर्ण झाले असून अतिरिक्त संस्थात्मक फेरीसाठी २ हजार २०३ जागा शिल्लक आहेत. तीन नियमित फेऱ्या आणि संस्थात्मक फेरीनंतरही अनेक जागा रिक्त राहिल्याने विद्यार्थ्यांना पुन्हा संधी देण्यात आली आहे. या विस्तारित फेरीत अर्ज दुरुस्ती आणि पसंतीक्रम भरण्याची सुविधा उपलब्ध करून देण्यात आली आहे.
विद्यार्थ्यांना ७ आणि ८ ऑक्टोबर दरम्यान आपल्या अर्जामध्ये आवश्यक दुरुस्त्या करून पसंतीक्रम भरण्याची संधी मिळणार आहे. यानंतर ९ ऑक्टोबर रोजी गुणवत्ता यादी जाहीर केली जाईल. प्रवेश मिळालेल्या विद्यार्थ्यांना ९ आणि १० ऑक्टोबर दरम्यान संबंधित महाविद्यालयात प्रत्यक्ष हजर राहावे लागेल. तिथे आवश्यक कागदपत्रे सादर करून शुल्क भरल्यानंतरच प्रवेश निश्चित होईल.
या अभ्यासक्रमासाठी एकूण १८ हजार ७७१ विद्यार्थ्यांनी नोंदणी केली होती. पहिल्या फेरीत २ हजार ६८६, दुसऱ्या फेरीत १ हजार ४७४ आणि तिसऱ्या फेरीत ३ हजार ४२९ अशा एकूण ७ हजार ५८९ विद्यार्थ्यांनी नियमित फेऱ्यांमध्ये प्रवेश घेतला. संस्थात्मक फेरीत ५ ऑक्टोबरपर्यंत ३ हजार ६२६ विद्यार्थ्यांनी प्रवेश पूर्ण केला. एकूण ११ हजार २१५ म्हणजे सुमारे ८३.५८ टक्के जागा भरल्या गेल्या आहेत.
सीईटी कक्षाच्या या निर्णयामुळे चुकीच्या अर्जांमुळे वंचित राहिलेल्या विद्यार्थ्यांना नवीन संधी उपलब्ध झाली आहे. विद्यार्थी हित monika लक्षात घेऊन घेतलेल्या या उपाययोजनेमुळे अधिक विद्यार्थ्यांना विधि शिक्षणाची वाट मोकळी होईल. इच्छुक विद्यार्थ्यांनी विहित वेळेत अर्ज दुरुस्ती आणि प्रवेश प्रक्रिया पूर्ण करावी, असे आवाहन करण्यात आले आहे.
