NMMS शिष्यवृत्ती परीक्षेच्या ऑनलाइन अर्ज प्रक्रियेला मुदतवाढ; इयत्ता ८ वीच्या विद्यार्थ्यांना मोठी संधी
राष्ट्रीय आर्थिक दुर्बल घटकातील (NMMS) विद्यार्थ्यांच्या शिष्यवृत्ती अर्जासाठी १४ ऑक्टोबरपर्यंत मुदतवाढ देण्यात आली आहे. या योजनेअंतर्गत इयत्ता ८ वीच्या प्रज्ञावान विद्यार्थ्यांना आर्थिक मदत देण्यासाठी महाराष्ट्र राज्य परीक्षा परिषदेमार्फत परीक्षा आयोजित करण्यात येणार आहे.
Eduvarta
एज्युवार्ता न्यूज नेटवर्क
राष्ट्रीय आर्थिक दुर्बल घटकातील (NMMS) विद्यार्थ्यांच्या शिष्यवृत्ती अर्जासाठी १४ ऑक्टोबरपर्यंत मुदतवाढ देण्यात आली आहे. या योजनेअंतर्गत इयत्ता ८ वीच्या प्रज्ञावान विद्यार्थ्यांना आर्थिक मदत देण्यासाठी महाराष्ट्र राज्य परीक्षा परिषदेमार्फत परीक्षा आयोजित करण्यात येणार आहे. सन २००७-०८ पासून सुरू झालेल्या या योजनेचा मुख्य उद्देश आर्थिक दुर्बलतेमुळे उच्च माध्यमिक स्तरापर्यंत होणारी विद्यार्थ्यांची गळती रोखणे आणि त्यांना सर्वोत्तम शिक्षणाची संधी उपलब्ध करून देणे हा आहे. या योजनेत निवड झालेल्या विद्यार्थ्यांना इयत्ता ९ वी ते १२ वी पर्यंत दरमहा १ हजार रुपये म्हणजेच वार्षिक १२ हजार रुपये शिष्यवृत्ती मिळते.
महाराष्ट्र राज्यातील शासकीय, शासनमान्य अनुदानित किंवा स्थानिक स्वराज्य संस्थेच्या शाळांमध्ये इयत्ता ८ वीत नियमित शिकणारे विद्यार्थी या परीक्षेस पात्र आहेत. पालकांचे एकत्रित वार्षिक उत्पन्न तीन लाख पन्नास हजार रुप्यांपेक्षा कमी असावे. नोकरीत असलेल्या पालकांनी आस्थापना प्रमुखांकडून तर इतरांनी तहसीलदार किंवा तलाठ्यांकडून सन २०२५-२६ च्या आर्थिक वर्षाचा उत्पन्नाचा दाखला शाळेच्या मुख्याध्यापकांकडे जमा करावा. शिष्यवृत्ती मिळविण्यासाठी निवड झाल्यानंतर इयत्ता ९ वी व ११ वी प्रथम संधीत पास होणे आणि इयत्ता १० वीत किमान ६० टक्के गुण (अनुसूचित जाती-जमातीसाठी ५५ टक्के) मिळवणे आवश्यक आहे.
विद्यार्थ्यांची निवड लेखी परीक्षेतील गुणांच्या आधारे व राज्याच्या आरक्षण धोरणानुसार केली जाईल. परीक्षा महाराष्ट्र राज्य परीक्षा परिषदेमार्फत विविध केंद्रावर २० डिसेंबर २०२६ रोजी घेण्यात येणार आहे. शिक्षणाधिकारी (माध्यमिक) किंवा बृहन्मुंबईतील शिक्षण निरीक्षक यांच्यामार्फत ही व्यवस्था केली जाईल. शिष्यवृत्तीचे वितरण शाळेचे मुख्याध्यापक, शिक्षणाधिकारी (माध्यमिक) आणि शिक्षण संचालक (योजना) यांच्यामार्फत होते.
आर्थिक दुर्बल घटकातील हुशार विद्यार्थ्यांना उच्च शिक्षणाची वाट मोकळी करण्यासाठी ही योजना महत्त्वाची आहे. पालक आणि शाळांनी वेळेत उत्पन्नाचा दाखला व इतर कागदपत्रे तयार ठेवावीत. अधिकृत संकेतस्थळांवरून शाळांमार्फत ऑनलाइन अर्ज प्रक्रिया पूर्ण करावी. ही संधी गमावू नये, असे शिक्षण विभागाने आवाहन केले आहे. प्रज्ञावान विद्यार्थ्यांच्या भविष्यासाठी ही शिष्यवृत्ती एक मजबूत आधार ठरू शकते.
