जेथे विद्यार्थी घडवले, तेथेच आयुष्य संपवले: फिनिक्स संचालकांचे टोकाचे पाऊल उचलले
छत्रपती संभाजीनगर शहरातील ‘फिनिक्स स्पोकन इंग्लिश क्लासेस’चे संचालक मोहन शिवराम कोरडे (वय ६०, रा. उस्मानपुरा) यांनी आर्थिक फसवणूक, कर्जबाजारीपणा आणि सरकारी कार्यालयांच्या थकवा देणाऱ्या फेऱ्यांमुळे हतबल होऊन स्वतःच्या वर्गात विष प्राशन केले.
Eduvarta
एज्युवार्ता न्यूज नेटवर्क
छत्रपती संभाजीनगर शहरातील ‘फिनिक्स स्पोकन इंग्लिश क्लासेस’चे संचालक मोहन शिवराम कोरडे (वय ६०, रा. उस्मानपुरा) यांनी आर्थिक फसवणूक, कर्जबाजारीपणा आणि सरकारी कार्यालयांच्या थकवा देणाऱ्या फेऱ्यांमुळे हतबल होऊन स्वतःच्या वर्गात विष प्राशन केले. उपचारादरम्यान आज पहाटे त्यांचा मृत्यू झाला. २५ वर्षांपूर्वी ज्या चार भिंतींमध्ये त्यांनी शहरातील अनेक विद्यार्थ्यांना इंग्रजी बोलणे शिकवण्यास सुरुवात केली होती, त्याच वर्गात त्यांनी आयुष्याचा शेवट केला. या दुःखद घटनेने स्थानिक शिक्षण क्षेत्रात खळबळ उडाली आहे.
कोरडे दाम्पत्य १९९६ ते २००१ दरम्यान पुण्यात इंग्रजी अध्यापनाचे काम करत होते. त्यानंतर ते छत्रपती संभाजीनगरमध्ये स्थायिक झाले आणि २००१ पासून शहरात विविध ठिकाणी स्पोकन इंग्लिशचे क्लासेस सुरू केले. २००६ मध्ये सिडको एन-१ येथील आयनॉक्स तापडिया सिने मार्केटमधील दुकान क्रमांक ७, ८ आणि ९ या जागा विजय रामचंद्र सांगवीकर आणि सुधा प्रभाकर साने यांच्याकडून ७.५ लाख रुपयांना खरेदी करण्याचा व्यवहार झाला. कोरडे यांनी संपूर्ण रक्कम अदा केली, मात्र आरोपींनी जागा नावावर न करता बनावट कागदपत्रे व खोटे बॉण्ड तयार करून फसवणूक केल्याचा आरोप आहे.
या प्रकरणात कोरडे यांच्या अर्जावरून २०११ मध्ये न्यायालयाच्या आदेशाने २०१२ मध्ये संबंधित व्यक्तींविरुद्ध गुन्हा दाखल झाला. मात्र तत्कालीन पोलिसांनी तपास पूर्ण केला नाही. उलट कोरडे दाम्पत्यावर खटला मागे घेण्यासाठी मानसिक दबाव आणण्यात आला आणि ‘हे पती-पत्नी फ्रॉड आहेत’ असे खोटे संदेश पसरवून त्यांची बदनामी करण्यात आली. परिणामी त्यांचा व्यवसाय पूर्णपणे कोलमडला आणि आर्थिक विवंचना वाढत गेली. याच परिस्थितीला कंटाळून मोहन कोरडे यांनी टोकाचे पाऊल उचलले.
कोरडे यांच्या पत्नी सुनीता यांच्या तक्रारीवरून एमआयडीसी सिडको पोलीस ठाण्यात विजय रामचंद्र सांगवीकर (रा. श्रेयसनगर), सुधा प्रभाकर साने (रा. भडकल गेट), उद्धव राऊत आणि संतोष जाधव यांच्याविरुद्ध आत्महत्या करण्यास प्रवृत्त केल्याचा गुन्हा दाखल करण्यात आला आहे. पोलिसांनी तपास सुरू केला असून या प्रकरणात अधिक तपशील उलगडण्याची अपेक्षा आहे. एकेकाळी शहरातील अनेक विद्यार्थ्यांना इंग्रजीचे धडे देणारे शिक्षक स्वतःच आर्थिक व न्यायिक व्यवस्थेच्या चक्रव्यूहात अडकून आयुष्य गमावले, ही घटना खूपच वेदनादायी आहे.
