CET-CELL: लॉ प्रवेश प्रक्रियेत ‘बेटरमेंट’ नियमांत बदल; पुढील फेऱ्यांचे संपूर्ण वेळापत्रक जाहीर
नव्या कार्यपद्धतीनुसार, उमेदवाराने फेरी-१ मध्ये दिलेल्या पसंतीक्रमात बदल किंवा फेररचना केल्यास आणि त्या सुधारित पसंतीक्रमानुसार त्याला नवीन महाविद्यालय मिळाल्यास, फेरी-१ मध्ये मिळालेल्या महाविद्यालयावरील त्याचा हक्क रद्द होणार आहे.
Eduvarta
एज्युवार्ता न्यूज नेटवर्क
महाराष्ट्र राज्य सामाईक प्रवेश परीक्षा कक्षाने शैक्षणिक वर्ष २०२६-२७ साठीच्या तीन वर्षांच्या विधी अभ्यासक्रमाच्या प्रवेश प्रक्रियेतील दुसरी, तिसरी तसेच संस्थात्मक फेरीचे वेळापत्रक जाहीर केले आहे. पहिल्या प्रवेश फेरीत राज्यभरातील ५ हजार ७७१ विद्यार्थ्यांनी विधी महाविद्यालयांमध्ये प्रवेश घेतला आहे. दुसऱ्या कॅप फेरीचे जागावाटप २९ ऑगस्ट २०२६ रोजी जाहीर करण्यात येणार आहे.दरम्यान सीईटी कक्षाने शैक्षणिक वर्ष २०२६-२७ मधील तीन व पाच वर्षीय विधी अभ्यासक्रमांच्या कॅप फेरी-२ मधील ‘बेटरमेंट’ पर्यायासंदर्भातील कार्यपद्धतीत सुधारणा केली आहे.
सीईटी कक्षातर्फे तीन वर्षीय विधी अभ्यासक्रमासाठी पहिल्या फेरीचे जागावाटप १९ ऑगस्ट रोजी करण्यात आले होते. या फेरीसाठी ४० हजार ४०३ विद्यार्थ्यांनी पसंतीक्रम भरला, त्यापैकी १४ हजार ९४८ विद्यार्थ्यांना विविध विधी महाविद्यालयांमध्ये जागावाटप करण्यात आले. जागावाटप झालेल्या विद्यार्थ्यांसाठी २० ते २२ ऑगस्टदरम्यान प्रवेश प्रक्रिया राबविण्यात आली. या कालावधीत ५,७७१ विद्यार्थ्यांनी आपला प्रवेश निश्चित केला.
दरम्यान, दुसऱ्या प्रवेश फेरीसाठी विद्यार्थ्यांना २४ ते २६ ऑगस्टदरम्यान ऑनलाइन पसंतीक्रम अर्थात ऑप्शन फॉर्म भरण्याची संधी देण्यात आली आहे. त्यानंतर २९ ऑगस्ट रोजी दुसऱ्या फेरीचे जागावाटप जाहीर केले जाणार आहे.
कॅप फेरी-१ मध्ये जागा मिळालेल्या आणि कॅप फेरी-२ मध्ये अधिक पसंतीचे महाविद्यालय मिळविण्यासाठी ‘बेटरमेंट’चा पर्याय निवडणाऱ्या उमेदवारांनी पसंतीक्रम भरताना विशेष काळजी घेण्याचे आवाहन करण्यात आले आहे.नव्या कार्यपद्धतीनुसार, उमेदवाराने फेरी-१ मध्ये दिलेल्या पसंतीक्रमात बदल किंवा फेररचना केल्यास आणि त्या सुधारित पसंतीक्रमानुसार त्याला नवीन महाविद्यालय मिळाल्यास, फेरी-१ मध्ये मिळालेल्या महाविद्यालयावरील त्याचा हक्क रद्द होणार आहे.
मात्र, उमेदवाराने फेरी-१ मधील पसंतीक्रम कायम ठेवून केवळ उच्च पसंतीच्या महाविद्यालयासाठी ‘बेटरमेंट’चा पर्याय निवडल्यास त्याला अधिक पसंतीचे महाविद्यालय मिळू शकते. अशा परिस्थितीत उच्च पसंतीचे महाविद्यालय न मिळाल्यास फेरी-१ मधील त्याचे पूर्वीचे जागावाटप अबाधित राहणार आहे. विद्यार्थ्यांनी ‘बेटरमेंट’चा पर्याय निवडताना पसंतीक्रमात अनावश्यक बदल टाळावेत आणि फेरी-२ साठी अर्ज सादर करण्यापूर्वी सर्व पर्यायांची काळजीपूर्वक पडताळणी करावी, असे आवाहन महाराष्ट्र राज्य सामाईक प्रवेश परीक्षा कक्षाने केले आहे.
सीईटी कक्षाने उमेदवारांना पसंतीक्रमात बदल करण्यापूर्वी त्याचे परिणाम समजून घेण्याचा सल्ला दिला आहे. एकदा पसंतीक्रम सादर केल्यानंतर त्यातून उद्भवणाऱ्या परिणामांची जबाबदारी संबंधित उमेदवाराची राहणार असल्याचे स्पष्ट करण्यात आले आहे.
विशेष म्हणजे, ही सुधारित मार्गदर्शक तत्त्वे २०२६-२७ या शैक्षणिक वर्षातील तीन वर्षीय आणि पाच वर्षीय विधी अभ्यासक्रमांच्या कॅप प्रवेश प्रक्रियेसाठी लागू राहणार आहेत. तसेच, कॅप फेरी-२ साठी दर्शविलेल्या रिक्त जागांचा विचार न करता उमेदवारांना आपल्या पसंतीचे कोणतेही महाविद्यालय किंवा पर्याय निवडता येणार असल्याचेही सीईटी कक्षाने स्पष्ट केले आहे.
महत्त्वाच्या तारखा
-
२४ ते २६ ऑगस्ट २०२६ : कॅप फेरी-२ साठी पसंतीक्रम/ऑप्शन फॉर्म भरणे
-
२९ ऑगस्ट २०२६ : कॅप फेरी-२ चे जागावाटप जाहीर
-
पुढील टप्पे : कॅप फेरी-३ आणि संस्थात्मक फेरीचे वेळापत्रक सीईटी कक्षाने जाहीर केलेल्या कार्यक्रमानुसार राबविण्यात येणार
