स्पर्धा परीक्षेच्या विद्यार्थ्यांचे धगधगते वास्तव सांगणारा 'यथावकाश’ चित्रपट अखेर आला

महाराष्ट्र लोकसेवा आयोगाचा (एमपीएससी) (MPSC) सक्सेस रेशो 0.001 टक्के बाकी 99.99 टक्के पोरांचा काय होतं? कुठे जाते ही गर्दी ?  एवढी प्रचंड मेहनत करून देखील लोकांच्या दृष्टीने ती ‘लूजर’ (loser) ठरतात. पण त्या पोरांच्या आत्मसन्मानाच काय ? एक परीक्षा पास नाही झाले म्हणून झिरो कशी ठरू शकतात ही मुलं ? मग नैराश्यातून आत्महत्येसारखे विचार पोरांच्या मनात येतात . एवढी बिकट परिस्थिती असून देखील पुढच्या वर्षी परत त्याच  0.001 टक्के अधिकाऱ्यांची भाषण ऐकून लाखो पोरांचे लोंढे पुन्हा स्पर्धा परीक्षेकडे वळतात. त्यावरच लख्ख प्रकाश टाकणारा आणि स्पर्धा परीक्षांचा competitive exam studentsअभ्यास करणा-या विद्यार्थ्यांचे धगधगते वास्तव सांगणारा चित्रपट (movie) स्पर्धा परीक्षांचा अभ्यास करणा-या मुलांनीच तयार केला आहे.

     होय ! स्पर्धा परीक्षांच्या माध्यमातून एक सरकारी पोस्ट मिळवण्यासाठी काय धडपड करावी लागते.काय खस्ता खाव्या लागतात हे ‘यथावकाश’ या चित्रपटातून लवकरच समोर येणार आहे.चित्रपटाचे लेखन दिग्दर्शन अविनाश शेंबेटवाड यांनी केले असून सहाय्यक दिग्दर्शक- शशांक गाडीलकर आहेत. या चित्रपटचा प्रिमीयर सोहळा येत्या  २३ एप्रिलला लॉ कॉलेज रोडवर असलेल्या नॅशनल फिल्म आर्काइव्ह ऑफ इंडिया येथे सायंकाळी ३.४५ वाजता होणार आहे. या कार्यक्रमाला प्रसिद्ध सिने दिग्दर्शक अक्षय इंडीकर, माजी प्रधान सचिव, महेश झगडे तसेच प्रसिद्ध नाटककार, अतुल पेठे उपस्थित असणार आहेत.

ग्रामीण भागातील शेतक-यांची लाखो मुलं पुणे मुंबई सारख्या शहरात स्पर्धा परीक्षेच्या माध्यमातून आपलं नशीब आजमावण्यासाठी येतात. लाल दिव्याच्या गाडीमध्ये बसून अधिकारी होण्याचे स्वप्न उराशी बाळगून दिवस रात्र स्पर्धा परीक्षांचा अभ्यास करतात. घरदार नातीगोती सगळ्याचा त्याग करून, बाहेरच्या जगापासून स्वतःला अलिप्त करून घेतात. ते फक्त त्या एका स्वप्नासाठी. मग ते स्वप्न कधी त्यांच आयुष्य बनुन जातं त्यांनाही कळत नाही. त्यात उदासीन सरकारी व्यवस्थेमुळे वर्षानुवर्षे परीक्षा नाही, वेळेवर निकाल नाही, निकाल लागला तर जॉइनिंग नाही अशा चक्रव्यूह मध्ये ही मुलं अडकून राहतात. शेवटी जेव्हा यातून बाहेर पडायचं ठरवतात तेव्हा उमेदिची सगळी वर्षे संपलेली असतात. हातामध्ये कसलही स्किल नाही, डोक्यामध्ये प्रचंड ज्ञान पण त्या ज्ञानाला बाजारात कुठे किंमत नाही. अशी अनेकांची स्थिती झालेली असते,अशा दुष्टचक्रात महाराष्ट्राच भविष्य अडकून पडलयं.                  

  यथावकाश हा चित्रपट अशा अनेक विषयांचा उलगडा करतो.चित्रपटाची  कथा ही विजय नावाच्या एका मुलाची आहे. विजय हा फक्त एक प्रतिनिधी आहे. त्याच्यासारखी लाखो मुलं झगमग जाहिराती बघून महागडी कोचिंग क्लास जॉईन करतात. एक वेळच्या डब्यामध्ये दोघेजण जेवतात. आठ बाय आठ खोलीमध्ये दाटीवाटीने 4-4 पोर कशी राहतात,असे वेगळे जग 'यथावकाश'च्या माध्यमातून पाहायला मिळणार आहे.

चित्रपटाचे सूरज गुट्टी आणि रामेश्वर आर हे कार्यकारी निर्माता आहेत.सुमेध अरुण यांनी संगीत दिले असून प्रोडक्शन मॅनेजर निकिता गायकवाड आणि विराज आहेत. असोसिएट डॉप : अक्षय, अजय घाडगे तर कॅमेरा असिस्टंट- अमोल नेरे यांनी काम पाहिले. साउंड डिझाईन अजिंक्य जुमाले यांचे आहे. एडिटर दिपक चौधरी असून आर्ट डायरेक्टर प्रिया राजेश आहेत. वेशभूषा- प्रियांका गायकवाड आणि प्रिया राजेश यांची असून मेकअप- सोनाली जेधे आणि प्रियांका गायकवाड यांनी केला.