राज्यातही पूजा खेडकर पॅटर्न; दोघांनी MPSC ला गंडवले? वडेट्टीवार यांनी थेट नावच सांगितले 

एज्युवार्ता न्यूज नेटवर्क 

प्रशिक्षणार्थी आयएएस अधिकारी पूजा खेडकर प्रकरणामुळे (Pooja Khedkar case) राज्यासह देशात खळबळ उडाली आहे. त्यातच आता राज्यातही असाच फसवणुकीचा प्रकार घडल्याचा खळबळजनक दावा राज्याजे विरोधी पक्षनेते विजय वडेट्टीवार (Vijay Vadettiwar) यांनी केला आहे.  त्यांनी म्हटले आहे की, सध्या सेवेत असलेल्या दोन अधिकाऱ्याऱ्यांनी खोटी प्रमाणपत्रे मिळवून एमपीएससीला (MPSC) गंठवले आहे. माधुरी कल्याण नष्टे व अजय कल्याण नष्टे (Madhuri Kalyan Nashte and Ajay Kalyan Nashte) या दोघांनी दिव्यांग असल्याचे सांगत एमपीएससीला गंडवले, असा आरोप वडेट्टीवार यांनी केला आहे.

वडेट्टीवार म्हणाले की, आयएएस पूजा खेडकर यांनी यूपीएससीला जसे गंडवले, अगदी तसाच प्रकार राज्यात एमपीएससीच्या बाबतीत घडता आहे. वडेट्टीवार यांनी राज्यातील दोन अधिकाऱ्यांची नावे घेत त्यांच्याविरोधात तक्रारही केली आहे. पूजा खेडकरवर तर केंद्र सरकार तसेच यूपीएससीकडून कारवाई सुरू झाली आहे. मात्र, एमपीएससीला गंडवणाऱ्या अधिका-यांच्या विरोधात कोणतीही कारवाई झाली नाही.
हे दोघेही उपजिल्हाधिकारी पदावर काम करत आहेत. माधुरी नष्टे सातारा येथे उपजिल्हाधिकारी तर अजय नष्टे सांगली येथे उपजिल्हाधिकारी म्हणून कार्यरत आहेत.

वडेट्टीवार यांनी आरोप केला आहे की, या दोघांनीही ८० टक्के दिव्यांग असल्याचे प्रमाणपत्र मिळवले आहे. त्यांचे दिव्यांग प्रमाणपत्र बोगस असून, या प्रमाणपत्राच्या आधारे त्यांनी शासकीय नोकरी मिळवती आहे. या दोघांच्याही दिव्यांग प्रमाणपत्राची चौकशी करून त्यांचे दिव्यांग प्रमाणपत्र बोगस आढळल्यास त्यांच्यावर फौजदारी गुन्हा दाखल करून त्यांना शासकीय सेवेतून बडतर्फ करण्याची मागणी वडेट्टीवार यांनी केली आहे.