गुन्हेगारी अड्डा बनलेल्या पालिकेच्या त्या शाळेची होणार चौकशी ;' एज्यु-वार्ता' च्या बातमीचा दणका 

एज्युवार्ता न्यूज नेटवर्क

आत वर्ग सुरु असताना शाळेच्या आवारात राजरोसपणे दारू पिणे, गांजा ओढणे, खुनी हल्ले करणे असे प्रकार पुणे महानगरपालिकेच्या बोपोडी PMC Bopodi school येथील शाळेत सुरु असल्याचे ' एज्यु-वार्ता ' eduvarta ने उघड केले होते.  या बातमीची दखल घेत या शाळेची चौकशी केली जाणार असून दोषींवर योग्य ती कारवाई करण्यात येणार असल्याचे  पुणे महानगरपालिकेच्या शिक्षण अधिकारी मीनाक्षी राऊत (Meenakshi Raut)यांनी सांगितले. 

बोपोडी येथील पुणे महानगर पालिकेच्या डॉ. सर्वपल्ली राधाकृष्ण प्रशाला या शाळेच्या आवारात डॉ. सर्वपल्ली राधाकृष्ण प्रशाला, पुणे महानगरपालिकेची उर्दू माध्यमाची शाळा आणि ' लेट अनंतराव पवार मेमोरियल इंग्लिश मिडीयम स्कुल ' अशा तीन शाळा चालवल्या जातात. या शाळेच्या आवारात जागोजागी दारूच्या बाटल्या, गुटखा, तंबाखूच्या पुड्या, जुगाराचे पत्ते पडलेले दिसतात. अगदी लहान वयातील तरुण मुले सिगारेट ओढताना दिसतात.

विशेष म्हणजे दारू आणि सिगारेट पिणाऱ्या या मुलांचा आणि त्या शाळेचा काहीच संबंध नसल्याचे स्पष्ट जाणवते. हे तरुण दारू आणि सिगारेट पिण्यासाठी शाळेच्या परिसराचा वापर करत आहेत. या संदर्भातील काही विडिओ 'एज्यु-वार्ता' च्या हाती लागले आहेत. विशेष म्हणजे शाळेत हे सर्व प्रकार घडत असताना शाळेच्या गेटवर वॉचमन नसल्याचेही आढळून आले. स्थानिक नागरिक आणि शाळा प्रशासनाला याबाबत विचारले असता शाळेत रखवालदार नसल्याचे त्यांनी सांगितले. 

याविषयी मीनाक्षी राऊत यांच्याशी संपर्क साधला असता त्या म्हणाल्या, " शाळेत एक निवासी रखवालदार नियुुक्त केले आहेत.मराठी, उर्दू आणि इंग्रजी माध्यमाच्या शाळेसाठी प्रत्येकी एक असे एकूण चार रखवालदार शाळेत आहेत. शाळेत जर असे गैरप्रकार घडत असतील तर ते अजिबात दुर्लक्षित केले जाणार नाहीत. पालिकेचे अधिकारी शाळेत जाऊन चौकशी करतील, मुख्याध्यापकांकडून लेखी घेतले जाईल. दोषी आढळल्यास संबंधितांवर योग्य ती कारवाई होईल,"