रेल्वेत पदवीधरांसाठी मोठी संधी; विविध ३५४८ पदांसाठी ६ नोव्हेंबरपर्यंत अर्ज करा
भारतीय रेल्वेत पदवीधर उमेदवारांसाठी मोठी संधी उपलब्ध झाली आहे. रेल्वे भरती मंडळांनी (RRB) २०२६ साठी नॉन-टेक्निकल पॉप्युलर कॅटेगरीज (NTPC) अंतर्गत पदवीधर स्तरावरील भरतीची अधिकृत अधिसूचना जाहीर केली आहे.
Eduvarta
एज्युवार्ता न्यूज नेटवर्क
भारतीय रेल्वेत पदवीधर उमेदवारांसाठी मोठी संधी उपलब्ध झाली आहे. रेल्वे भरती मंडळांनी (RRB) २०२६ साठी नॉन-टेक्निकल पॉप्युलर कॅटेगरीज (NTPC) अंतर्गत पदवीधर स्तरावरील भरतीची अधिकृत अधिसूचना जाहीर केली आहे. रेल्वे मंत्रालयाच्या माहितीनुसार एकूण ३ हजार ५४८ पदे भरली जाणार आहेत. ऑनलाइन अर्ज प्रक्रिया सुरू झाली आहे. इच्छुक आणि पात्र उमेदवारांना रेल्वेचे अधिकृत संकेतस्थळ rrbapply.gov.in आणि rrb.indianrailways.gov.in वर जाऊन ऑनलाइन पद्धतीने अर्ज भरावा लागणार आहे. अर्ज भरण्याची अंतिम मुदत ६ नोव्हेंबर २०२६ रात्री ११.५९ पर्यंत आहे. तर शुल्क भरण्याची शेवटची तारीख ८ नोव्हेंबर आहे, तर अर्जात दुरुस्तीची मुदत ९ ते १८ नोव्हेंबरपर्यंत राहील.
ही भरती चार मुख्य पदसंवर्गांसाठी आहे. त्यात चीफ कमर्शियल कम तिकीट सुपरवायझरसाठी १२७, गुड्स ट्रेन मॅनेजरसाठी २ हजार ७५०, ज्युनिअर अकाउंट्स असिस्टंट कम टायपिस्टसाठी ३०० आणि सीनियर क्लर्क कम टायपिस्टसाठी ३७१ जागा आहेत. गुड्स ट्रेन मॅनेजर पदासाठी सर्वाधिक संधी उपलब्ध असल्याने अनेक उमेदवारांना आकर्षण वाटेल. गेल्या चक्रात याच स्तरावर ५ हजार ८१० जागा होत्या, यंदा मात्र त्यांची संख्या कमी झाली आहे. त्याचवेळी बारावी स्तरासाठी स्वतंत्र अधिसूचना सीईएन अंतर्गत १ हजार ६८८ जागाही जाहीर झाल्या आहेत.
पात्रतेबाबत किमान शैक्षणिक अर्हता पदवी असणे आवश्यक आहे. वयोमर्यादा १८ ते ३३ वर्षे ठेवण्यात आली आहे. आरक्षित प्रवर्गासाठी वयोमर्यादा आणि इतर सवलती अधिसूचनेत स्पष्ट केल्या आहेत. जागांचे प्रवर्गनिहाय वितरण असे आहे – खुल्या प्रवर्गासाठी १ हजार ५१७, अनुसूचित जातीसाठी ५५३, अनुसूचित जमातीसाठी ३००, इतर मागासवर्ग (नॉन-क्रीमी लेअर) साठी ८७३ आणि आर्थिकदृष्ट्या दुर्बल घटकांसाठी ३०५ जागा. मुंबई आरआरबीसाठी सुमारे १५५ जागा असल्याचे शैक्षणिक संकेतस्थळांवरून कळते. सर्व आरआरबीनुसार तपशील अधिसूचनेच्या परिशिष्टात उपलब्ध आहे.
उमेदवारांना सविस्तर अधिसूचना, रिक्त पदांचे वितरण, पात्रता निकष आणि इतर अद्ययावत माहिती रेल्वे भरती मंडळाच्या अधिकृत संकेतस्थळांवर rrbapply.gov.in आणि rrb.indianrailways.gov.in तपासता येईल. अर्ज प्रक्रिया पूर्णपणे ऑनलाइन असल्याने उमेदवारांनी वेळेवर कागदपत्रे तयार ठेवावीत आणि शेवटच्या क्षणाला घाई न करता अर्ज करावा.
रेल्वेतील ही भरती हजारो पदवीधर युवकांसाठी स्थिर नोकरीची संधी निर्माण करणारी आहे. योग्य तयारी करून आणि वेळेवर अर्ज सादर करून उमेदवारांना या संधीचा लाभ घेता येईल. अधिक माहितीसाठी अधिकृत संकेतस्थळ नियमित तपासावे, असे आवाहन संबंधित यंत्रणेकडून करण्यात आले आहे.
