भाजपकडून उमेदवारी जाहीर; शरद लाड यांचा पत्ता कट; पदवीधरसाठी नवा चेहरा
लाड यांना डावलून पुणे पदवीधर मतदारसंघासाठी स्मिता जाधव यांचे नाव निश्चित करण्यात आले आहे. आज भारतीय जनता पक्षात प्रवेश करून स्मिता जाधव या पदवीधर निवडणुकीसाठी अर्ज दाखल करणार आहेत.
Eduvarta
एज्युवार्ता न्यूज नेटवर्क
भारतीय जनता पक्षाकडून अखेर पुणे शिक्षक व पदवीधर निवडणुकीसाठी उमेदवारी निश्चित करण्यात आली आहे. पुणे पदवीधर मतदारसंघातून स्मिता योगेश जाधव यांना उमेदवारी जाहीर झाली असून शिक्षक मतदार संघासाठी कौस्तुभ गावडे यांचे नाव निश्चित करण्यात आले आहे. त्यामुळे आसगावकर आणि गावडे यांच्यात थेट लढत होणार आहे.
गेल्या काही महिन्यांपासून पुणे पदवीधर मतदारसंघासाठी शरद लाड यांना उमेदवारी दिली जाणार असल्याचे बोलले जात होते. उमेदवारी मिळणार या आशेवरच शरद लाड यांनी भारतीय जनता पक्षात प्रवेश केला होता. परंतु, लाड यांना डावलून पुणे पदवीधर मतदारसंघासाठी स्मिता जाधव यांचे नाव निश्चित करण्यात आले आहे. आज भारतीय जनता पक्षात प्रवेश करून स्मिता जाधव या पदवीधर निवडणुकीसाठी अर्ज दाखल करणार आहेत.
स्मिता जाधव यांना उमेदवारी मिळाल्याने राष्ट्रवादी काँग्रेस शरद पवार गटाकडून हर्षदा देशमुख यांना उमेदवारी दिली जाण्याची दाट शक्यता आहे. दोन महिला उमेदवारांमध्ये पदवीधर निवडणुकीची लढत होण्याची शक्यता आहे. त्यामुळे इतर इच्छुक उमेदवारांचे पत्ते कट होणार असल्याचे बोलले जात आहे.
पुणे शिक्षक मतदारात संघातून कौस्तुभ गावडे यांना भारतीय जनता पक्षाकडून अधिकृत उमेदवारी जाहीर करण्यात आली. मात्र शिक्षकांचा आमदार शिक्षकच हवा ही टॅगलाईन घेऊन निवडणूक लढण्यास इच्छुक असणारे उमेदवार सचिन सानप हे सुद्धा सोमवारी अर्ज दाखल करण्याची शक्यता आहे. तसेच मंगेश चिमटे, दत्तात्रय सावंत, आणि बी.पी.रोंगे हे सुद्धा निवडणुकीसाठी अर्ज दाखल करतील, असे बोलले जात आहे.
