MPSC : ६ महिन्यांपासून नियुक्तीच्या प्रतीक्षेत असलेल्या उमेदवारांचे अजित पवारांना निवेदन..

एज्युवार्ता न्यूज नेटवर्क

अधिकारी होण्याचे स्वप्न उराशी बाळगणारे तरुण अपार कष्ट आणि मेहनत घेऊन एमपीएससी (MPSC) सारखी कठीण परीक्षा पास होतात, मात्र, नियुक्तीसाठी त्यांना सहा-सहा महिने ताटकळत ठेवले जाते. राज्यकर निरीक्षक (State Tax Inspector Exam 2022) पदांच्या 93 जागांसाठी जून 2022 भरती प्रक्रिया पार पडली.परीक्षा होऊन निवड झालेल्या विद्यार्थ्यांची कागदपत्रे पडताळणी (Documents verification complete) प्रक्रिया मार्च 2024 मध्ये पार पडून 6 महिने झाले. मात्र, निवड झालेल्या उमेदवारांना अद्याप नियुक्ती देण्यात आली नाही. त्यामुळे नियुक्तीच्या प्रतीक्षेत असलेल्या उमेदवारांनी उपमुख्यमंत्री अजित पवार (Deputy CM Ajit Pawar) यांच्या विभागाची संबंधित प्रश्न असल्याने त्यांना पत्र लिहिले आहे. आपण या प्रकरणात लक्ष घालून लवकरात लवकर आमच्या नियुक्तीचा प्रश्न मार्गी लावावा, अशी मागणी या उमेदवारांनी निवेदनाद्वारे अजित पवार यांच्याकडे केली आहे. 

महाराष्ट्र लोकसेवा आयोगामार्फत राज्यकर निरीक्षक साठी 93 पदांची जाहिरात जुन 2022 मध्ये प्रसिद्ध झाली. परीक्षेचे सर्व टप्पे पूर्ण करून सदर जाहिरातीचा निकाल डिसेंबर 2023 मध्ये प्रसिद्ध झाला. 9 फेब्रुवारी 2024 रोजीच्या पत्राद्वारे एकूण 93 उमेदवारांची राज्यकर निरीक्षक 2022 पदी शिफारस करण्यात आली. तसेच कागदपत्र पडताळणी 19 मार्च ते 21 मार्च 2024 रोजी पूर्ण झालेली आहे. कागदपत्र पडताळणी पूर्ण होऊन 6 महिने उलटूनही आम्हाला अद्याप नियुक्ती मिळालेली नाही.

याबाबत विभागात विचारणा केली असता, सुरुवातीला लोकसभा निवडणूक आचारसंहितेमुळे नियुक्ती देता येणार नाही असे सांगण्यात आले. आचारसंहितेनंतर याबाबत पुन्हा चौकशी केली असता GST विभागाच्या पुनर्रचना प्रक्रियेचे कारण सांगण्यात आले, सदर प्रक्रिया पूर्ण झाल्याशिवाय नियुक्ती देता येणार नाही असे उत्तर कळवण्यात आले. परंतु सदर प्रक्रियेच्या कालावधी दरम्यानच राज्यकर निरीक्षक 2021 वेटींग उमेदवार तसेच कर सहायक 2022 उमेदवारांना मात्र विभागाकडून नियुक्ती देण्यात आली. पुनर्रचना प्रक्रिया पूर्ण झाल्यानंतर याबाबत GST विभागाशी पुन्हा संपर्क साधला असता प्रोमोशन, बदल्या चालू असल्याचे सांगण्यात आले आहे. 

सदर जाहिरातीचा अंतिम निकाल लागून जवळपास 9 महिन्यांहून अधिक कालावधी उलटून गेला आहे. नियुक्तीअभावी आम्हा उमेदवारांना प्रचंड आर्थिक, सामाजिक व मानसिक तणावातून जावे लागत आहे. आता येणाऱ्या काही काळात विधानसभेची आचारसंहिता लागू शकते. त्यात आमच्या नियुक्तीचा मुद्दा पुन्हा अडकून पडण्याची शक्यता आहे. त्यामुळे आपण या प्रकरणात लक्ष घालून लवकरात लवकर आमच्या नियुक्तीचा मुद्दा मार्गी लावावा, अशी मागणी उमेदवारांनी अजित पवारांनी दिलेल्या निवेदतनात म्हटले आहे.