NTA UGC NET डिसेंबर २०२६ अधिसूचना जाहीर; अर्ज प्रक्रिया सुरू
नॅशनल टेस्टिंग एजन्सी ने युनिव्हर्सिटी ग्रँट्स कमिशन नॅशनल एलिजिबिलिटी टेस्ट डिसेंबर २०२६ सत्राची अधिकृत अधिसूचना प्रसिद्ध केली आहे.
Eduvarta
एज्युवार्ता न्यूज नेटवर्क
नॅशनल टेस्टिंग एजन्सी (NTA) ने युनिव्हर्सिटी ग्रँट्स कमिशन नॅशनल एलिजिबिलिटी टेस्ट (UGC NET) डिसेंबर २०२६ सत्राची अधिकृत अधिसूचना प्रसिद्ध केली आहे. उच्च शिक्षण क्षेत्रात सहाय्यक प्राध्यापक पदासाठी पात्रता तसेच ज्युनियर रिसर्च फेलोशिप मिळविण्यासाठी ही परीक्षा महत्त्वाची मानली जाते. डिसेंबर सत्रात परीक्षा देऊ इच्छिणाऱ्या पात्र उमेदवारांना NTA च्या अधिकृत वेबसाइट ugcnet.nta.nic.in वर जाऊन ऑनलाइन नोंदणी करता येणार आहे. अर्ज प्रक्रिया ८ ऑक्टोबर २०२६ रोजी सुरू झाली असून इच्छुक उमेदवारांनी वेळेवर अर्ज भरण्याची सूचना देण्यात आली आहे.
UGC NET डिसेंबर २०२६ साठी अर्ज करण्याची अंतिम तारीख २८ ऑक्टोबर २०२६ आहे. विलंब शुल्कासह अर्ज ३१ ऑक्टोबरपर्यंत स्वीकारले जातील. अर्जातील चुका दुरुस्त करण्यासाठी २ ते ४ नोव्हेंबर २०२६ दरम्यान दुरुस्ती विंडो उपलब्ध असेल. परीक्षा १४ ते १९ डिसेंबर २०२६ दरम्यान देशभरातील विविध केंद्रांवर आयोजित करण्यात येणार आहे. प्रवेशपत्र परीक्षेच्या काही दिवस आधी अधिकृत संकेतस्थळावर उपलब्ध होईल. उमेदवारांनी प्रवेशपत्र डाउनलोड करून परीक्षा केंद्रावर सोबत नेणे आवश्यक आहे.
नोंदणी पूर्ण झाल्यानंतर उमेदवारांना निर्धारित शुल्क भरावे लागेल. सर्वसाधारण आणि ओबीसी उमेदवारांसाठी शुल्क १,१५० रुपये, ईडब्ल्यूएस तसेच ओबीसी-एनसीएल उमेदवारांसाठी ६०० रुपये तर अनुसूचित जाती, अनुसूचित जमाती आणि दिव्यांग उमेदवारांसाठी ३२५ रुपये निश्चित करण्यात आले आहे. शुल्क ऑनलाइन पद्धतीनेच भरावे लागेल. अर्ज भरताना सर्व माहिती काळजीपूर्वक तपासावी, कारण चुकीच्या माहितीमुळे अर्ज रद्द होण्याची शक्यता असते.
पात्रता, अभ्यासक्रम आणि इतर तपशीलांसाठी उमेदवारांनी अधिकृत अधिसूचना काळजीपूर्वक वाचावी. वेळेवर अर्ज भरणे आणि शुल्क जमा करणे महत्त्वाचे आहे. अधिक माहितीसाठी ugcnet.nta.nic.in या संकेतस्थळावर नियमित भेट द्यावी, असे आवााहन करण्याात आले आहे.
