चिवटेंच्या माघारी नंतरही गावडेंना निवडणूक जड जाणार; संस्थाचालक विरुद्ध शिक्षक सामना रंगणार 

एज्युवार्ता न्यूज नेटवर्क 

पुणे शिक्षक मतदार संघातून निवडणूक अर्ज मागे घेण्याची मुदत संपली असून शिवसेना शिंदे गटाचे अधिकृत उमेदवार मंगेश चिमटे यांनी आपला उमेदवारी अर्ज मागे घेतला आहे. मात्र चिवटे यांनी अर्ज मागे घेतला असला तरी शिक्षक विरुद्ध संस्थाचालक या मुद्द्यावर पुढे निवडणूक रंगणार आहे. त्यामुळे भारतीय जनता पक्षाचे अधिकृत उमेदवार कौस्तुभ गावडे यांना पुणे शिक्षक मतदारसंघाची निवडणूक जड जाणार आहे, असे जाणकारांकडून सांगितले जात आहे.

पुणे शिक्षक मतदार संघातून काँग्रेस पक्षातर्फे जयंत असगावकर यांनी उमेदवारी अर्ज दाखल केला आहे. तर भारतीय जनता पक्षाकडून कौस्तुभ गावडे निवडणुकीच्या रिंगणात उतरले आहेत. मात्र आसगावकर यांच्याबाबत शिक्षकांमध्ये तीव्र नाराजी असल्याचे बोलले जात आहे. त्यातच सोलापूर जिल्ह्यात माजी आमदार दत्तात्रय सावंत आणि बी.पी.रोंगे हे प्रमुख उमेदवार निवडणुक लढवत आहेत. सोलापूर जिल्ह्यात मतांची विभागणी होणार आहे. तर कोल्हापूर जिल्ह्यात गावडे आणि आसगावकर यांच्यात थेट लढत होणार असल्याने कोल्हापूरची मते सुद्धा विभागली जाणार आहेत. 

सातारा व सांगली जिल्ह्यातून एकही सक्षम उमेदवार निवडणूक लढवत नसल्याने या जिल्ह्यातील मते उमेदवारांना फायद्याची ठरणार आहेत. मात्र, पुणे जिल्ह्यात "शिक्षकांचा आमदार शिक्षकच हवा" ही भूमिका घेऊन निवडणुकीच्या रिंगणात उतरलेले प्राध्यापक सचिन सानप यांनी उमेदवारी अर्ज कायम ठेवला आहे. पुणे जिल्ह्यातून निवडणूक लढवण्यासाठी दुसऱ्या एकाही सक्षम उमेदवाराने अर्ज भरलेला नाही. त्यातच अनेक संघटनांकडून सानप यांना पाठिंबा मिळाला आहे. त्यामुळे पुणे जिल्ह्यातील मतदार कोणाच्या बाजूने कौल देणार ? यावर पुणे शिक्षक मतदार संघातील आमदाराचे भवितव्य अवलंबून असणार आहे. 

शिक्षक विरुद्ध संस्थाचालक या सामन्यात कोण बाजी मारणार ? हे येणारा काळच ठरवणार आहे. मात्र,  शिक्षक हे सुजाण असतात संस्थाचालकाच्या बाजूने कौल द्यायचा की शिक्षकाच्या बाजूने मताचे दान करायचे?,  संस्थाचालक शिक्षकांचे प्रश्न सोडवू शकतो की शिक्षकच शिक्षकांचे प्रश्न सोडवू शकतो हे समजण्याइतके शिक्षक निश्चितच हुशार आहेत. त्यामुळे कौस्तुभ गावडे यांना मंगेश चिमटे यांनी माघार घेतली असली तरी निवडणूक जड जाणार असल्याचे दिसून येत आहे.