सैनिकी शाळेत धक्कादायक प्रकार! हसतखेळत विद्यार्थ्याला शाळेत सोडलं; तासाभरात संशयास्पद मृत्यू
चंद्रपूर जिल्ह्यातील विसापूर येथील सन्मित्र सैनिक विद्यालयात इयत्ता सहावीत शिकणाऱ्या जीवन विलास झरेकर या अवघ्या १२ वर्षीय विद्यार्थ्याचा संशयास्पद मृत्यू झाल्याची धक्कादायक घटना समोर आली आहे.
Eduvarta
एज्युवार्ता न्यूज नेटवर्क
चंद्रपूर जिल्ह्यातील विसापूर येथील सन्मित्र सैनिक विद्यालयात इयत्ता सहावीत शिकणाऱ्या जीवन विलास झरेकर या अवघ्या १२ वर्षीय विद्यार्थ्याचा संशयास्पद मृत्यू झाल्याची धक्कादायक घटना समोर आली आहे. राजुरा तालुक्यातील खांबाळा गावचा रहिवासी असलेल्या जीवनला शाळेत सोडून वडील गावाकडे परतत असतानाच शिक्षकांचा वाटेतच फोन आला आणि मुलाच्या मृत्यूची धक्कादायक बातमी कानावर पडली. एका तासापूर्वी डोळ्यांसमोर असलेल्या लेकराच्या निधनाची बातमी ऐकताच पित्याच्या पायाखालची जमीन सरकली आणि कुटुंबावर दुःखाचा डोंगर कोसळला. विद्यालय परिसरात या घटनेने खळबळ उडाली असून हळहळ व्यक्त होत आहे.
सकाळी जीवनच्या शरीरावर फुरळ आल्यामुळे वडिलांनी त्याला चंद्रपूर येथील एका खासगी रुग्णालयात नेले होते. मात्र, तेथे कोणतीही औषधे किंवा इंजेक्शन देण्यात आले नसल्याचे वडिलांनी सांगितले. त्यानंतर काही तासांनी त्यांनी मुलाला शाळेत सोडले आणि स्वतः गावाकडे निघाले. गावात पोहोचण्यापूर्वीच शिक्षकाच्या फोनवरून जीवनचा मृत्यू झाल्याची माहिती मिळाली. प्राथमिक माहितीनुसार, जीवन विद्यालयाच्या परिसरात गंभीर अवस्थेत आढळला होता. त्याला तातडीने चंद्रपूर जिल्हा शासकीय रुग्णालयात दाखल करण्यात आले, परंतु वैद्यकीय तपासणीनंतर डॉक्टरांनी त्याला मृत घोषित केले.
या घटनेनंतर विद्यालयातील इतर अनेक विद्यार्थ्यांच्या अंगावरही फुरळ असल्याची माहिती समोर येत आहे. त्यामुळे विद्यार्थ्यांच्या अंगावर फुरळ येण्यामागील कारण काय, त्याचा जीवनच्या प्रकृतीशी काही संबंध होता का आणि विद्यालयातील परिस्थिती नेमकी काय होती, असे अनेक प्रश्न उपस्थित होत आहेत. मात्र, या माहितीची अधिकृत पुष्टी अद्याप झालेली नाही. फुरळ येणे आणि जीवनचा मृत्यू यांच्यात संबंध आहे की नाही, हेही स्पष्ट झालेले नाही. भिवकुंड परिसरातील या विद्यालयात घडलेल्या या दुःखद घटनेने परिसरातील पालक आणि नागरिकांमध्ये चिंता निर्माण झाली आहे.
स्थानिक प्रशासन आणि पोलीस याबाबत चौकशी करत आहेत. १२ वर्षीय विद्यार्थ्याच्या अशा अकाली मृत्यूने संपूर्ण परिसरात शोककळा पसरली असून शाळेच्या सुरक्षिततेबाबत आणि विद्यार्थ्यांच्या आरोग्याबाबत प्रश्नचिन्ह निर्माण झाले आहे. या घटनेची सखोल चौकशी होऊन सत्य समोर येणे आवश्यक आहे, असे मत परिसरातील नागरिक व्यक्त करीत आहेत.
