पुण्यातील MPSC विद्यार्थी आंदोलनात मोठी घडामोड; ३ उपोषणकर्त्या विद्यार्थ्यांनी उपोषण सोडले
पुण्यातील एस. एम. जोशी पुलावर महाराष्ट्र लोकसेवा आयोगाच्या (MPSC) अध्यक्षांच्या राजीनाम्याच्या प्रमुख मागणीसह विविध मुद्द्यांसाठी विद्यार्थ्यांचे आंदोलन सुरू आहे. या आंदोलनाला राष्ट्रवादी काँग्रेस शरद पवार गटाचे आमदार रोहित पवार यांनी पाठिंबा दर्शवत स्वतः सहभाग घेतला आहे.
Eduvarta
एज्युवार्ता न्यूज नेटवर्क
पुण्यातील एस. एम. जोशी पुलावर महाराष्ट्र लोकसेवा आयोगाच्या (MPSC) अध्यक्षांच्या राजीनाम्याच्या प्रमुख मागणीसह विविध मुद्द्यांसाठी विद्यार्थ्यांचे आंदोलन सुरू आहे. या आंदोलनाला राष्ट्रवादी काँग्रेस शरद पवार गटाचे आमदार रोहित पवार यांनी पाठिंबा दर्शवत स्वतः सहभाग घेतला आहे. आंदोलनाच्या केंद्रस्थानी असलेल्या उपोषणाबाबत एक महत्त्वाची घडामोड घडली आहे. उपोषणाला बसलेल्या सात विद्यार्थ्यांपैकी तिघांनी मध्यरात्री उपोषण सोडल्याची घोषणा केली आहे.
सोमनाथ चव्हाण, ऋषिकेश गांगुर्डे आणि गजानन शेळके या तीन विद्यार्थ्यांनी काँग्रेसचे आमदार विश्वजित कदम यांच्या हस्ते दूध घेऊन उपोषणाची सांगता केली. आमदार रोहित पवार यांनी सोशल मीडियावर पोस्ट करून ही माहिती दिली. आंदोलनात सहभागी काही विद्यार्थ्यांची प्रकृती खालावल्याने त्यांना उपोषण मागे घ्यावे लागले, असे त्यांनी स्पष्ट केले. उपोषण सुरू ठेवल्यास तिघांच्या किडनीवर गंभीर परिणाम होण्याचा धोका निर्माण झाल्याचे सांगण्यात आले. त्यामुळेच या विद्यार्थ्यांनी उपोषण सोडण्याचा निर्णय घेतला. मात्र उर्वरित चार विद्यार्थ्यांचे उपोषण सुरूच राहणार आहे.
MPSC अध्यक्ष विवेक भीमनवार यांच्या राजीनाम्याच्या मागणीवर आंदोलनकर्ते ठाम आहेत. अध्यक्षांचा राजीनामा मिळाल्याशिवाय आंदोलन मागे घेणार नसल्याची भूमिका रोहित पवार यांनी घेतली आहे. विद्यार्थ्यांच्या विविध मागण्यांसाठी सुरू असलेल्या या आंदोलनाला अनेक राजकीय नेत्यांनी भेट देऊन पाठिंबा जाहीर केला आहे. मागील काही दिवसांची पार्श्वभूमी पाहता आंदोलनकर्त्यांची एकजूट आणि निर्धार स्पष्ट दिसून येत आहे.
मुख्यमंत्री आणि विद्यार्थी प्रतिनिधींमध्ये ३० सप्टेंबर रोजी एक बैठक झाली होती. या बैठकीत बहुतांश मागण्या मान्य झाल्याचा दावा करण्यात आला. मात्र आयोगाच्या अध्यक्षांच्या राजीनाम्याची मागणी मान्य न झाल्याने आंदोलनकर्त्यांनी भूमिका कायम ठेवली. तीन विद्यार्थ्यांनी आरोग्याच्या कारणाने उपोषण सोडले असले तरी उर्वरित विद्यार्थ्यांचे आंदोलन सुरूच आहे. त्यामुळे पुढील घडामोडींकडे सर्वांचे लक्ष लागले आहे.
