स्कूल बस फी UPI ने भरणे १५ ऑक्टोबरपासून बंद; पालकांना चेक-कार्डचा पर्याय
पालकांसाठी एक महत्त्वाची आणि तातडीची बातमी समोर आली आहे. मुलांच्या शाळेच्या बसची फी आता UPI द्वारे भरता येणार नाही. स्कूल बस ओनर्स असोसिएशनने हा निर्णय घेतला असून तो १५ ऑक्टोबरपासून लागू होणार आहे.
Eduvarta
एज्युवार्ता न्यूज नेटवर्क
पालकांसाठी एक महत्त्वाची आणि तातडीची बातमी समोर आली आहे. मुलांच्या शाळेच्या बसची फी आता UPI द्वारे भरता येणार नाही. स्कूल बस ओनर्स असोसिएशनने (SBOA) हा निर्णय घेतला असून तो १५ ऑक्टोबरपासून लागू होणार आहे. या तारखेनंतर UPI मार्गे केलेली बस फी स्वीकारली जाणार नाही, असे असोसिएशनने स्पष्ट केले आहे. अनेक पालक सध्या डिजिटल पेमेंटचा सोपा पर्याय वापरतात, मात्र आता त्यांना चेक कार्ड सारखा पर्यायी मार्ग शोधावा लागेल.
या निर्णयामागे मुख्य कारण आहे २ हजार रुपयांपेक्षा जास्त रकमेच्या UPI व्यवहारांवर आकारली जाणारे शुल्क हे आहे. पेमेंट गेटवेकडून अशा व्यवहारांवर फी वसूल केली जाते. काही व्यवहारांमध्ये ही फी २०० रुपयांपर्यंत पोहोचते, असे बस व्यवस्थापनाकडून सांगण्यात येत आहे. शाळेची ६ महिन्यांची बस फी बहुतेक वेळा २ हजारांपेक्षा जास्त असते. त्यामुळे प्रत्येक पेमेंटनंतर अतिरिक्त शुल्क भरावे लागेल, त्यामुळे हा निर्णय घेण्यात आला आहे.
सध्याच्या परिस्थितीत अनेक शाळा आणि बस व्यवस्थापन हे अतिरिक्त शुल्क स्वतःच सोसत आहेत. यामुळे त्यांच्यावर अनावश्यक खर्च येत असल्याने UPI स्वीकारणे बंद करण्याचा निर्णय घेण्यात आला आहे. असोसिएशनचे म्हणणे आहे की, या शुल्कामुळे व्यवसायावर दबाव येतो आणि तो टाळण्यासाठी हा उपाय आवश्यक आहे. पालकांना आता बस फी चेक किंवा क्रेडिट कार्डद्वारे भरावी लागेल.
या बदलामुळे पालकांना थोडी अडचण होऊ शकते, कारण UPI हा सर्वात सोपा आणि जलद पर्याय होता. आर्थिक स्थिरता राखण्यासाठी हा निर्णय अपरिहार्य आहे. पालकांनी १५ ऑक्टोबरपूर्वीच पर्यायी पेमेंट पद्धतींची तयारी करावी, जेणेकरून मुलांच्या शाळा बस सेवा सुरळित राहील, असे व्यवस्थापनाने सांगितले आहे.
