आरटीई प्रवेशासाठी खोटे रहिवासी पुरावे सादर करणाऱ्या १४ पालकांविरुद्ध फसवणुकीचा गुन्हा दाखल
खेड तालुक्यात आरटीई अंतर्गत २५ टक्के प्रवेशासाठी खोटे किंवा दिशाभूल करणारे रहिवासी पुरावे सादर केल्याच्या गंभीर आरोपावरून १४ पालकांवर पोलीस कारवाई झाली आहे. खेड पोलीस ठाण्यात फसवणुकीचा गुन्हा दाखल करण्यात आला आहे.
Eduvarta
एज्युवार्ता न्यूज नेटवर्क
खेड तालुक्यात आरटीई अंतर्गत २५ टक्के प्रवेशासाठी खोटे किंवा दिशाभूल करणारे रहिवासी पुरावे सादर केल्याच्या गंभीर आरोपावरून १४ पालकांवर पोलीस कारवाई झाली आहे. खेड पोलीस ठाण्यात फसवणुकीचा गुन्हा दाखल करण्यात आला आहे. पालकांनी आपल्या मुलांना नामांकित शाळांमध्ये प्रवेश मिळवून देण्यासाठी चुकीच्या कागदपत्रांचा आधार घेतला असल्याचा आरोप आहे.
गटशिक्षणाधिकारी अमोल जंगले यांनी याबाबत फिर्याद दाखल केली आहे. मार्च २०२६ ते मे २०२६ या कालावधीत राजगुरूनगर येथील पंचायत समितीच्या तालुकास्तरीय आरटीई प्रवेश समितीकडे संबंधित पालकांनी इयत्ता पहिलीतील प्रवेशासाठी रहिवासी पत्त्याची कागदपत्रे सादर केली होती. या कागदपत्रांच्या आधारे त्यांच्या पाल्यांना डॉ. विश्वनाथ कराड वर्ल्ड पीस स्कूल आळंदी आणि पोदार इंटरनॅशनल स्कूल आंबेठाण या शाळांमध्ये आरटीई कोट्यातून प्रवेश मिळाला.
मात्र नंतर तपासणीत असे समोर आले की, सादर केलेल्या रहिवासी पुराव्यांमध्ये नमूद केलेल्या पत्त्यावर हे पालक प्रत्यक्षात राहत नव्हते. प्रशासनाला दिशाभूल करून आरटीईच्या माध्यमातून आपल्या मुलांना शाळेत प्रवेश मिळवून घेतल्याचे फिर्यादीत स्पष्ट करण्यात आले आहे. या कृतीमुळे खऱ्या पात्र विद्यार्थ्यांचे हक्क डावलले गेल्याची शक्यता व्यक्त केली जात आहे.
खेड पोलीस ठाण्याने गटशिक्षणाधिकारी यांच्या फिर्यादीच्या आधारे संबंधित १४ पालकांविरुद्ध फसवणूक आणि खोटी कागदपत्रे सादर केल्याचा गुन्हा दाखल केला आहे. या प्रकरणात पुढील चौकशी सुरू असून दोषींवर कायदेशीर कारवाई होईल, असे पोलीसांकडून सांगितले जात आहे. आरटीई योजनेचा उद्देश गरजू आणि पात्र विद्यार्थ्यांना गुणवत्तापूर्ण शिक्षण उपलब्ध करून देणे हा आहे. अशा प्रकारच्या गैरप्रकारांमुळे योजनेच्या मूळ उद्देशाला बाधा येते. शिक्षण प्रशासनाने भविष्यात कागदपत्रांची अधिक काटेकोर पडताळणी करण्याची गरज आहे.
