MPSC विद्यार्थी आंदोलनात फूट? राजकीय हस्तक्षेपामुळे उद्याचे आंदोलन रद्द; आता २ ऑक्टोबरला 'सत्याग्रह'
महाराष्ट्र लोकसेवा आयोगाचे अध्यक्ष विवेक भीमनवार यांच्या राजीनाम्याची जोरदार मागणी आणि परीक्षा पद्धतीतील बदलांच्या मुद्द्यांमुळे पुण्यातील स्पर्धा परीक्षेच्या विद्यार्थ्यांमध्ये तीव्र असंतोष निर्माण झाला आहे.
Eduvarta
एज्युवार्ता न्यूज नेटवर्क
महाराष्ट्र लोकसेवा आयोगाचे अध्यक्ष विवेक भीमनवार यांच्या राजीनाम्याची जोरदार मागणी आणि परीक्षा पद्धतीतील बदलांच्या मुद्द्यांमुळे पुण्यातील स्पर्धा परीक्षेच्या विद्यार्थ्यांमध्ये तीव्र असंतोष निर्माण झाला आहे. गेल्या काही दिवसांपासून शहरभर वातावरण तापले असून विद्यार्थ्यांच्या प्रलंबित प्रश्नांवरून आंदोलनाची तयारी सुरू आहे. मात्र या आंदोलनाला राजकीय रंग दिला जात असल्याच्या आरोपांमुळे विद्यार्थ्यांमध्ये दोन गट पडले आहेत. अशा पार्श्वभूमीवर २७ सप्टेंबरला जाहीर झालेले आंदोलन पुढे ढकलण्यात आले आहे.
पुणे पोलीस आयुक्त अमितेश कुमार यांनी विद्यार्थी प्रतिनिधींशी बैठक घेतली. गणेशोत्सवाच्या बंदोबस्तामुळे गेल्या बारा दिवसांपासून पोलीस दलावर प्रचंड ताण असल्याचे सांगत २७ सप्टेंबरचे आंदोलन पुढे ढकलण्याची विनंती करण्यात आली. पोलीस प्रशासनाची ही विनंती विद्यार्थी प्रतिनिधींनी मान्य केली. त्यामुळे आंदोलन स्थगित करण्यात आले.
आता महात्मा गांधी जयंतीच्या दिवशी म्हणजे २ ऑक्टोबर रोजी विद्यार्थी ‘सत्याग्रह’ आंदोलन करणार आहेत. ज्यांनी जगाला सत्याग्रहाचा मार्ग दाखवला, त्यांच्या स्मृतिदिनानिमित्त हा लढा पुढे नेण्याचा ठाम निर्धार विद्यार्थी प्रतिनिधींनी व्यक्त केला आहे. “भ्रष्ट अध्यक्षांचे विसर्जन होईपर्यंत माघार नाही,” असे त्यांनी स्पष्ट केले आहे.
मात्र आंदोलनाला राजकीय स्वरूप दिल्याचा आक्षेप काही विद्यार्थ्यांनी घेतला आहे. मुख्यमंत्र्यांशी चर्चा करणाऱ्या निखिल पाटील यांनी राजकीय नेत्यांच्या उपस्थितीवर प्रश्न उपस्थित करत हे आंदोलन विद्यार्थ्यांचे नसून राजकीय पक्षाचे असल्याचा आरोप केला. विद्यार्थ्यांच्या प्रश्नांसाठी आंदोलन हवे, पण राजकीय हस्तक्षेप नको, अशी भूमिका एका गटाने मांडली आहे.
आंदोलनाच्या केंद्रस्थानी विवेक भीमनवार यांचा राजीनामा, तुकाराम मुंढे आणि सुनील गेडाम यांची अध्यक्षपदी नियुक्ती तसेच परीक्षा ऑनलाइनऐवजी ऑफलाइन पद्धतीने घेण्याची मागणी आहे. २ ऑक्टोबरच्या सत्याग्रहात दोन्ही गट एकत्र येतील की मतभेद आणखी स्पष्ट होतील, याकडे स्पर्धा परीक्षा वर्तुळाचे लक्ष लागले आहे.
