मतदाराचे नाव प्रशांत दादा साहेबांची बॉम्बस्फोट; शिक्षक निवडणुकीत बोगस मतदार ? 

एज्युवार्ता न्यूज नेटवर्क 

देशभरात निवडणूक आयोगाने मतदार याद्यांमध्ये घातलेल्या गोंधळाने वातावरण तापलेले असताना आता पुणे शिक्षक मतदार निवडणुकीच्या यादीत प्रशांत दादा साहेबांचा बॉम्बस्फोट या नावाच्या मतदाराचा समावेश असल्याची धक्कादायक माहिती समोर आली आहे. आमदार रोहित पवार यांनी सोशल मीडिया हँडलवर या संदर्भातील यादीच प्रसिद्ध केली आहे. त्यामुळे निवडणूक आयोगाच्या कारभारावर प्रश्न उपस्थित केले जात आहेत. 

राज्यात शिक्षक व पदवीधर निवडणूक चा कार्यक्रम जाहीर झाला आहे. मात्र आयोगाने मतदार नोंदणीसाठी पुरेसा वेळ दिला नाही. त्यावर पुणे शिक्षक मतदार संघातून निवडणूक लढण्यास इच्छुक असलेले उमेदवार प्रा.सचिन सानप यांनी पत्रकार परिषद घेऊन निवडणूक आयोगाच्या कार्यपद्धतीवर आपली भूमिका स्पष्ट केली. तसेच याबाबत न्यायालयात याचिका दाखल करण्यात आली असल्याचे सांगितले. त्यानंतर आता आमदार रोहित पवार यांनी पुणे शिक्षक मतदार संघाच्या यादीतील बोगस मतदारांची नावे प्रसिद्ध केली आहेत.

सातारा जिल्ह्यातील इंडस्ट्रियल ट्रेनिंग इन्स्टिट्यूट महाबळेश्वर येथील 'प्रशांत दादा साहेबांची बॉम्बस्फोट' असे शिक्षक मतदाराचे नाव यादीत असल्याचे आढळून आले आहे. 3 डिसेंबर 2025 रोजी प्रसिद्ध करण्यात आलेल्या प्रारूप यादीमध्ये भाग क्रमांक 218 मध्ये 30 नंबरच्या मतदाराचे नाव प्रशांत दादा साहेबांची बॉम्बस्फोट असे आहे. संबंधित मतदाराचा पत्ता सोनगीरवाडी वाई,सातारा असा देण्यात आला आहे. 

निवडणूक आयोगाकडून मतदार याद्यांच्या शुद्धीकरणासंदर्भात राबविल्या जात असलेल्या मोहिमेवर विरोधकांकडून टीका केली जात असताना आता शिक्षक मतदार यादीतील गोंधळ समोर आला आहे. त्यामुळे यासंदर्भात विरोधकांकडून निवडणूक आयोगाला प्रश्न उपस्थित केले जाऊ शकतात. 

रोहित पवार यांनी सोशल मीडियावर शिक्षक मतदार यादी प्रसिद्ध करून ही लोकशाहीची थट्टा असल्याचे नमूद केले आहे. तसेच आत्तापर्यंत सर्वसामान्य निवडणुकीच्या याद्यांमध्ये बोगस मतदार होते.आता निवडणुकीच्या निमित्ताने शिक्षक पदवीधर याद्या सारख्या मर्यादित मतदानात देखील बोगस मतदार असल्याचे आढळून आले आहे, तसेच जोपर्यंत मतदार यादी हा शुद्ध होत नाही, तोपर्यंत निवडणूक आयोगाने ही मतदान प्रक्रिया थांबवावी,अशी मागणी आमदार रोहित पवार यांनी केले आहे.