SPPU कुलगुरू, कुलसचिवांची रिफॅक्टरीला अचानक भेट; अन्नाच्या दर्जाची, स्वच्छतेची पाहणी

एज्युवार्ता न्यूज नेटवर्क 

विद्यापीठातील विद्यार्थ्यांना दिल्या जाणाऱ्या भोजनाचा दर्जा आणि भोजनालयातील स्वच्छतेची प्रत्यक्ष पाहणी करण्यासाठी कुलगुरूंनी रिफॅक्टरी भोजनालयाला अचानक भेट दिली. यावेळी त्यांनी भोजनालयातील व्यवस्थेची पाहणी करण्याबरोबरच स्वतः भोजन करून अन्नाच्या गुणवत्तेची प्रत्यक्ष पडताळणी केली.यावेळी अधिसभा सदस्य प्रसेनजित फडणवीस, कुलसचिव प्रा. प्रफुल्ल पवार, अधिष्ठाता प्रा. प्रभाकर देसाई यांच्यासह विद्यापीठातील अधिकारी उपस्थित होते.

अचानक भेटीदरम्यान कुलगुरूंनी भोजनालयातील स्वयंपाकघर, स्वयंपाकासाठी वापरण्यात येणारी उपकरणे, कच्चा माल साठवण्याची पद्धत तसेच परिसरातील स्वच्छता व स्वच्छताविषयक बाबींची बारकाईने पाहणी केली. अन्नधान्य व इतर खाद्यपदार्थ योग्य दर्जाचे असून ते सुरक्षित आणि स्वच्छ वातावरणात साठवले जातात का, याचीही त्यांनी माहिती घेतली.

भोजनालयात उपस्थित विद्यार्थ्यांशी कुलगुरूंनी संवाद साधत त्यांना दररोज मिळणाऱ्या भोजनाचा दर्जा, मेनू आणि उपलब्ध सुविधांबाबत थेट अभिप्राय घेतला. विद्यार्थ्यांच्या आरोग्याच्या दृष्टीने भोजनाची गुणवत्ता, स्वच्छता आणि आवश्यक सुविधांकडे विशेष लक्ष देण्याच्या सूचना त्यांनी संबंधित व्यवस्थापनाला दिल्या.

विद्यार्थ्यांना दर्जेदार व स्वच्छ भोजन उपलब्ध करून देण्यासाठी भोजनालयाच्या व्यवस्थापनाने आवश्यक त्या उपाययोजना सातत्याने राबवाव्यात, असेही त्यांनी यावेळी स्पष्ट केले.