सावित्रीबाई फुले यांचा जीवनपट उलगडणारी शिल्प उद्घाटनाच्या प्रतीक्षेत; विद्यापीठाला मुहूर्त मिळेना
सावित्रीबाई फुले यांच्या जयंतीनिमित्त विद्यापीठात विविध कार्यक्रमाचे आयोजन करण्यात आले आहे. परंत, ही शिल्प आणखी काही दिवस उद्टघाटनाच्या प्रतीक्षेत राहणार आहेत.
eduvarta@gmail.com 
एज्युवार्ता न्यूज नेटवर्क
सावित्रीबाई फुले पुणे विद्यापीठाच्या मुख्य इमारती समोरील आवारात क्रांतीज्योती सावित्रीबाई फुले यांचा जीवनपट उलगडला जाईल, असे शिल्प उभारण्यात आली आहेत. परंतु, एक वर्षाहून अधिक कालावधीपासून ही शिल्प उद्नघाटनाच्या प्रतीक्षेत आहेत. येत्या 3 जानेवारी रोजी सावित्रीबाई फुले यांच्या जयंतीनिमित्त या शिल्पांचे उद्घाटन व्हावे,अशी अपेक्षा होती. परंतु, या दिवशी सुद्धा उद्घाटन होऊ शकणार नाही. त्यामुळे विद्यार्थी संघटनांकडून खेद व्यक्त केला जात आहे.
पुणे विद्यापीठाला क्रांतीज्योती सावित्रीबाई फुले यांचे नाव देण्यात आले. त्यानंतर विद्यापीठाच्या मुख्य इमारतीसमोर सावित्रीबाई फुले यांचा पूर्णाकृती पुतळा उभारण्यात आला. सावित्रीबाई फुले यांच्या जीवन कार्याचा परिचय सर्वांना व्हावा, या दृष्टीने 28 शिल्प तयार करून ती विद्यापीठाच्या मुख्य इमारती समोरील परिसरात उभी करण्यात आली. या शिल्पांचे उद्घाटन राष्ट्रपती यांच्या हस्ते व्हावे, यासाठी विद्यापीठ प्रशासनातर्फे राष्ट्रपती कार्यालयाकडे पत्रव्यवहार करण्यात आला.
सावित्रीबाई फुले यांच्या जयंतीनिमित्त विद्यापीठात विविध कार्यक्रमाचे आयोजन करण्यात आले आहे. परंत, ही शिल्प आणखी काही दिवस उद्घाटनाच्या प्रतीक्षेत राहणार आहेत. विद्यापीठाचा वर्धापन दिन येत्या 10 फेब्रुवारी रोजी आहे. त्यानिमित्ताने या शिल्पांचे उद्घाटन करण्याचा विचार विद्यापीठ प्रशासनाकडून केला जात आहे. सध्या महापालिकेच्या निवडणुकांची आचारसंहिता सुरू असल्यामुळे राजकीय नेत्यांच्या हस्ते शिल्पांचे उद्घाटन करणे शक्य नाही. त्यामुळे 3 जानेवारी रोजी या शिल्पांचे उद्घाटन होऊ शकणार नाही, असे बोलले जात आहे.
-------------------------------------
वर्षाहून अधिक कालावधीपासून प्रलंबित असलेल्या क्रांतीज्योती सावित्रीबाई फुले यांच्या शिल्पाच्या उद्घाटनासाठी प्रमुख पाहुण्यांची गरज नाही. विद्यापीठाचे कुलगुरू डॉ. सुरेश गोसावी यांनी स्वत: जयंती निमित्त या शिल्पाचे उद्घाटन करावे. अन्यथा विद्यार्थी हे काम हाती घेतील.
- कल्पेश यादव, सहसचिव, युवासेना, महाराष्ट्र राज्य
-----------------------
विद्यापीठाला ज्यांचे नाव दिले अशा क्रांतीज्योती सावित्रीबाई फुले यांच्या शिल्पाचे उद्घाटन करण्यासाठी पाहुणे मिळत नाही, ही अत्यंत वेदनादायक बाब आहे. विद्यापीठ आणखी किती वर्ष शिल्पाचे उद्घाटन करणार नाही, यांची विचारणा विद्यापीठ प्रशासनाला केली जाईल.
- राहुल ससाणे, अध्यक्ष, विद्यार्थी विद्यापीठ विकास कृती समिती,
-------------------
विद्यापीठात राजकीय हस्तक्षेप वाढला आहे.त्यामुळे राजकीय व्यक्तीच्या हस्ते सावित्रीबाई फुले यांच्या शिल्पाचे उद्घाटन व्हावे, यासाठी विद्यापीठाने वाट पाहू नये तर शिक्षण, साहित्य, कला किंवा इतर क्षेत्रात उल्लेखनीय काम करणाऱ्या मान्यवर महिलेच्या हस्ते उद्घाटन करावे.
- संतोष मदने, सचिव, सावित्रीबाई फुले पुणे विद्यापीठ कर्मचारी संघ,
