UGC NET परीक्षेच्या वेळापत्रकात बदल 

एज्युवार्ता न्युज नेटवर्क 

UGC NET जून 2024 (UGC NET June 2024)  परीक्षेस नोंदणी केलेल्या उमेदवारांसाठी (Registered candidates) मोठी बातमी आहे. नॅशनल टेस्टिंग एजन्सीने (NTA) विद्यापीठ अनुदान आयोगाच्या (UGC) राष्ट्रीय पात्रता चाचणीच्या (NET) जून 2024 परीक्षेच्या पुनर्परीक्षेच्या (re-examination) पूर्वी जाहीर केलेल्या वेळापत्रकात बदल (timetable changes) केले आहेत.  

एजन्सीने जारी केलेल्या अधिसूचनेनुसार, 26 ऑगस्टसाठी प्रस्तावित असलेली परीक्षा आता 27 ऑगस्ट रोजी घेण्यात येणार आहे. 26 ऑगस्ट रोजी येणाऱ्या श्री कृष्ण जन्माष्टमी सणाच्या पार्श्वभूमीवर NTA ने हा बदल केला आहे.

NTA ने 2 ऑगस्ट रोजी एकूण 83 विषयांसाठी UGC NET जून 2024 परीक्षेचे वेळापत्रक जाहीर केले होते, त्यानुसार हिंदी आणि तत्त्वज्ञान या विषयांची परीक्षा 26 ऑगस्ट रोजी पहिल्या सत्रात  सकाळी 9 ते 12 या वेळेत होणार होती. यानंतर दुसऱ्या शिफ्टमध्ये म्हणजेच दुपारी 3 ते 6 या वेळेत हिंदी, उडिया, नेपाळी, मैनपुरी, आसामी आणि संथाली या भाषांच्या परीक्षा होणार होत्या. मात्र, आता नवीन बदलानंतर या विषयांच्या परीक्षा  २७ ऑगस्टला त्याच शिफ्टमध्ये घेतल्या जाणार आहेत. 

दरम्यान, NTA ने नुकतेच  UGC NET ऑगस्ट परीक्षेच्या परीक्षा शहर सूचना स्लिप जारी केली आहेत. मात्र, नियुक्त केलेल्या परीक्षा शहरात कोणत्या केंद्रावर परीक्षा द्यावी लागेल, याची माहिती उमेदवारांना प्रवेशपत्राद्वारे दिली जाईल. मागील परीक्षांच्या पद्धतीनुसार उमेदवारांना परीक्षेच्या तारखेच्या 2-3 दिवस आधी प्रवेशपत्र दिले जातील.