AICTE च्या शैक्षणिक कॅलेंडरमध्ये बदल; प्रवेशाची मुदत वाढवली, विद्यार्थ्यांना दिलासा

एज्युवार्ता न्यूज नेटवर्क 

ऑल इंडिया कौन्सिल फॉर टेक्निकल एज्युकेशनने (AICTE) आपल्या शैक्षणिक कॅलेंडर 2024-25 मध्ये बदल (Changes in Academic Calendar) केला आहे.  23 सप्टेंबर 2024 रोजी सर्वोच्च न्यायालयाच्या (Supreme Court) आदेशानंतर ही दुरुस्ती करण्यात आली आहे. सुधारित शैक्षणिक दिनदर्शिकेनुसार, तांत्रिक संस्थांमध्ये प्रथम वर्षाच्या विद्यार्थ्यांना प्रवेश घेण्याची अंतिम तारीख आता 23 ऑक्टोबरपर्यंत वाढवण्यात आली आहे. यापूर्वी, संलग्न संस्थांसाठी प्रवेशाची अंतिम तारीख 15 सप्टेंबर 2024 होती.अधिसूचनेनुसार, AICTE ने तांत्रिक संस्थांमधील द्वितीय वर्षाच्या विद्यार्थ्यांसाठी प्रवेशाची अंतिम तारीख 23 ऑक्टोबर केली आहे. यापूर्वी ही मुदत 15 सप्टेंबरपर्यंत होती.

AICTE च्या सुधारित कॅलेंडरनुसार, तांत्रिक वर्गाच्या प्रथम वर्षाच्या विद्यार्थ्यांचे वर्ग 23 ऑक्टोबरपासून सुरू होतील. दरम्यान, भारतीय अंतराळ संशोधन संस्थेने (ISRO) अंतराळ तंत्रज्ञानातील अल्प पदवीसाठी AICTE मॉडेल अभ्यासक्रम (AICTE Model course) सुरू केला आहे. 

AICTE च्या अधिकृत नोटीसमध्ये असे म्हटले आहे की, 'प्रवेशाच्या अंतिम तारखेतील ही मुदतवाढ पोस्ट ग्रॅज्युएट डिप्लोमा इन मॅनेजमेंट (PGDM) आणि पोस्ट ग्रॅज्युएट सर्टिफिकेट इन मॅनेजमेंट (PGCM) प्रोग्राम ऑफर करणाऱ्या स्टँडअलोन संस्थांसाठी वैध नाही. या संस्थांनी त्यांच्या मूळ प्रवेशाच्या मुदतींचे पालन करणे आवश्यक आहे, जी बदलली जाणार नही.'