बीडमध्ये धक्कादायक प्रकार! शिक्षकाने सहकारी शिक्षक आणि भावाला मेसेज करून संपवले जीवन
बीड शहरातील संस्कार विद्यालयात प्राथमिक विभागात शिक्षक म्हणून कार्यरत असलेल्या ३५ वर्षीय संदीप विलास जोशी यांनी आपली जीवनयात्रा संपवल्याची अत्यंत दुर्दैवी घटना समोर आली आहे.
Eduvarta
एज्युवार्ता न्यूज नेटवर्क
बीड शहरातील संस्कार विद्यालयात प्राथमिक विभागात शिक्षक म्हणून कार्यरत असलेल्या ३५ वर्षीय संदीप विलास जोशी यांनी आपली जीवनयात्रा संपवल्याची अत्यंत दुर्दैवी घटना समोर आली आहे. खंदेश्वरी देवी मंदिर परिसरातील विहिरीत त्यांचा मृतदेह आढळला. कोणतेही स्पष्ट कारण नसताना घरातून निघून गेलेल्या जोशी यांचा मोबाइल बंद होता. कुटुंबीयांनी शोध घेतला तरी ते सापडले नाहीत. नागरिकांनी विहिरीत तरंगणारा मृतदेह पाहिल्यानंतर पेठ बीड पोलिसांनी तातडीने घटनास्थळी येऊन मृतदेह बाहेर काढला. शवविच्छेदनासाठी मृतदेह जिल्हा सामान्य रुग्णालय बीड येथे नेण्यात आला.
आत्महत्येपूर्वी संदीप जोशी यांनी आपल्या लहान भाऊ सचिन याला मेसेज करून घोंडनगर भागातील दोन प्लॉट, बँकेतील ठेवी आणि लॉकरमधील वस्तूंची माहिती दिली होती. त्यांनी लिहिले की, “कुटुंबाची जबाबदारी आता मी तुझ्यावर सोपवत आहे. माझ्याभोवती काही घटना घडल्या, माझा त्यात दोष नव्हता. परंतु मनाला आलेली उदासीनता आणि हताशा यामुळे मी हे पाऊल उचलत आहे.” या मेसेजमधून त्यांच्या मनातील नैराश्य स्पष्ट होते.
त्यांनी एका सहकारी शिक्षकालाही मेसेज पाठवून दिलगिरी व्यक्त केली. “सर, मी अध्यापनात कमी पडलो, मला क्षमा करा,” असे नमूद करून त्यांनी वर्गाची हजेरी, रजिस्टर, पालक संपर्क वही आणि पावती पुस्तक लॉकर्समध्ये ठेवल्याचे सांगितले. या घटनेमुळे शिक्षण क्षेत्रात आणि शिक्षक वर्गात मोठी हळहळ व्यक्त होत आहे. सकाळी नातेवाईक आणि नागरिकांनी घटनास्थळी गर्दी केली होती.
पोलिसांकडून मिळालेल्या माहितीनुसार, सुरुवातीला याप्रकरणी कोणतीही अधिकृत तक्रार नोंदवली गेली नव्हती. तक्रार प्राप्त झाल्यानंतर पुढील कायदेशीर कारवाई केली जाईल, असे शहर पोलीस ठाण्याचे पोलीस निरीक्षक प्रवीणकुमार बांगर यांनी स्पष्ट केले. या दुःखद घटनेने बीड शहरातील शिक्षण क्षेत्राला मोठा धक्का बसला आहे.
