SPPU विद्यापीठाच्या कक्षेत बोगस कॉलेज; विद्यार्थ्यांना TC मिळेना, विद्यापीठाची कारवाई
पुण्यातील सिनर्जी फाउंडेशनच्या सिनर्जी स्कूल ऑफ कॉमर्स पुणे या महाविद्यालयाचा कोणताही थांगपत्ता लागत नसल्याचे समोर आले आहे. एका विद्यार्थिनीने संबंधित महाविद्यालय टीसी देत नसल्याची तक्रार विद्यापीठाकडे केली होती.
Eduvarta
एज्युवार्ता न्यूज नेटवर्क
सावित्रीबाई फुले पुणे विद्यापीठाची संलग्न असणाऱ्या अनेक महाविद्यालयांना पूर्णवेळ प्राध्यापक व प्राचार्य नसल्यामुळे विद्यापीठाने कारवाई करण्याची भूमिका घेतली होती. मात्र आता विद्यापीठाशी संलग्नित नसूनही विद्यार्थ्यांना प्रवेश देणारे एक बोगस महाविद्यालय समोर आले आहे. त्यामुळे विद्यार्थ्यांनी संबंधित महाविद्यालयात प्रवेश घेऊ नये, असे आवाहन विद्यापीठातर्फे करण्यात आले आहे.
सावित्रीबाई फुले पुणे विद्यापीठाची संलग नाचणाऱ्या महाविद्यालयांनाच विविध अभ्यासक्रमांना विद्यार्थ्यांना आपल्या महाविद्यालयात प्रवेश देता येतो. मात्र, पुण्यातील सिनर्जी फाउंडेशनच्या सिनर्जी स्कूल ऑफ कॉमर्स पुणे या महाविद्यालयाचा कोणताही थांगपत्ता लागत नसल्याचे समोर आले आहे. एका विद्यार्थिनीने संबंधित महाविद्यालय टीसी देत नसल्याची तक्रार विद्यापीठाकडे केली होती. त्यानंतर विद्यापीठाने संबंधित महाविद्यालयाच्या दूरध्वनी क्रमांक वर संपर्क करण्याचा प्रयत्न केला. परंतु कोणीही दूरध्वनी उचलला नाही. त्यानंतर विद्यापीठाने चौकशी समिती स्थापन करून या समितीला संबंधित महाविद्यालयाच्या पत्त्यावर भेट देण्यासाठी पाठवले. मात्र दिलेल्या पत्त्यावर हे महाविद्यालय अस्तित्वात नसल्याचे समितीला आढळून आले.
विद्यापीठाची संलग्न नसताना विद्यार्थ्यांना प्रवेश देणे बेकायदेशीर आहे. तसेच विद्यापीठाची कोणतीही पूर्वपरवानगी न घेता एका जागेवरून दुसऱ्या जागेवर महाविद्यालय हलवता येत नाही. त्यामुळे विद्यापीठाने सिनर्जी फाउंडेशन च्या सिनर्जी स्कूल ऑफ कॉमर्स महाविद्यालयावर कारवाई केली आहे.
विद्यापीठाच्या शैक्षणिक संलग्नता कक्षा तर्फे याबाबत जाहीर प्रकटन प्रसिद्ध करण्यात आले आहे. सिनर्जी फाउंडेशनच्या सिनर्जी स्कूल ऑफ कॉमर्स या महाविद्यालयास विविध कारणांमुळे शैक्षणिक वर्ष 202627 पासून विद्यापीठाने संलग्निकरण दिलेले नाही. तरी शैक्षणिक वर्ष 2026 27 पासून सिनर्जी फाउंडेशन स्कूल ऑफ कॉमर्स या महाविद्यालयामध्ये कोणत्याही अभ्यासक्रमास विद्यार्थ्यांनी प्रवेश घेऊ नये, असे या जाहीर प्रकटनात नमूद करण्यात आले आहे.
विद्यापीठाच्या कॉमर्स व मॅनेजमेंट विद्याशाखेचे अधिष्ठाता डॉ.धनंजय मंडलिक म्हणाले, या महाविद्यालयाबाबत एका विद्यार्थिनीची लेखी तक्रार विद्यापीठाकडे प्राप्त झाली होती.विद्यापीठाने संबंधित महाविद्यालयाच्या चौकशीसाठी समिती स्थापन केली होती. या समितीने महाविद्यालयाच्या पत्त्यावर जाऊन महाविद्यालयाचा शोध घेतला. मात्र, दिलेल्या जागेवर महाविद्यालय आढळून आले नाही. हे महाविद्यालय बोगस आहे.त्यामुळे विद्यापीठाने महाविद्यालयावर कारवाई केली आहे.
