शासकीय रेखाकला व उच्चकला परीक्षा शुल्क आणि पारितोषिक रकमेत मोठी वाढ; शासन निर्णय प्रसिद्ध
उच्च व तंत्रशिक्षण विभागाने शासकीय रेखाकला तसेच उच्चकला परीक्षांच्या शुल्कात आणि पारितोषिक रकमेत लक्षणीय वाढ केली आहे. महाराष्ट्र राज्य कला शिक्षण मंडळ व कला संचालनालयाच्या प्रस्तावानुसार वित्त विभागाने मान्यता दिल्यानंतर हा शासननिर्णय प्रसिद्ध झाला.
Eduvarta
एज्युवार्ता न्यूज नेटवर्क
उच्च व तंत्रशिक्षण विभागाने शासकीय रेखाकला तसेच उच्चकला परीक्षांच्या शुल्कात आणि पारितोषिक रकमेत लक्षणीय वाढ केली आहे. महाराष्ट्र राज्य कला शिक्षण मंडळ व कला संचालनालयाच्या प्रस्तावानुसार वित्त विभागाने मान्यता दिल्यानंतर हा शासननिर्णय प्रसिद्ध झाला. २०१२ नंतर चौदा वर्षांनी झालेली ही वाढ शैक्षणिक वर्ष २०२६-२७ पासून लागू होईल. यामुळे विद्यार्थ्यांना परीक्षा व संबंधित सेवांसाठी अधिक शुल्क भरावे लागणार आहे, तर गुणवत्ताधारकांना मोठ्या प्रमाणात पारितोषिक मिळतील.
रेखाकला परीक्षेत एलिमेंटरीसाठी राज्यातील विद्यार्थ्यांचे शुल्क ५० वरून १०० रुपये तर राज्याबाहेरील विद्यार्थ्यांचे १०० वरून २०० रुपये झाले आहे. इंटरमिजिएटसाठी अनुक्रमे १०० वरून २०० आणि २०० वरून ४०० रुपये आकारले जाणार आहेत. पारितोषिक रक्कम एकूण ५६ हजारांवरून ४ लाख २$ हजार रुपयांपर्यंत वाढवण्यात आली आहे. एलिमेंटरीमध्ये पहिल्या २० विद्यार्थ्यांना २ हजार, २१ ते ४० क्रमांकांना १ हजार, ४१ ते १०० क्रमांकांना १ हजार तर विषयनिहाय १० विद्यार्थ्यांना ५०० रुपये मिळतील. इंटरमिजिएटमध्ये पहिल्या २० विद्यार्थ्यांना ३ हजार, २१ ते ४० नंबरच्या विद्यार्थ्यांना २५०० हजार, ४१ ते १०० नंबरच्या विद्यार्थ्यांना २ हजार आणि विषयनिहाय १० विद्यार्थ्यांना १ हजार रुपये पारितोषिक दिले जाईल.
उच्चकला परीक्षांच्या शुल्कातही वाढ झाली आहे. मूलभूत अभ्यासक्रमाचे शुल्क ४४० वरून ७०० रुपये, कलाशिक्षक पदविकेचे प्रथम व द्वितीय वर्ष अनुक्रमे ६२० व ६४० वरून ९५० रुपये, कला शिक्षण शास्त्र पदविका १ हजार ४० वरून १ हजार ६०० रुपये, आर्ट मास्टर प्रमाणपत्र ६४० वरून ९५० रुपये झाले आहे. रेखा-रंगकला, उपयोजित कला, शिल्पकला इंटरमिजिएटसाठी वरून १ हजार ४५० तर पदविकेसाठी १ हजार ४१० वरून २१५० रुपये आकारले जातील. वस्त्रकाम, विणकाम आदी आर्ट अँड क्राफ्ट अभ्यासक्रमांसाठीही ९६० ऐवजी १४५०रुपये शुल्क लागेल.
सेवा शुल्कातही वाढ करण्यात आली आहे. राज्यातील विद्यार्थ्यांसाठी दुय्यम गुणपत्रक १०० रुपये, उच्चकला दुय्यम प्रमाणपत्र १५० रुपये, रेखाकला दुय्यम प्रमाणपत्र २००, नाव दुरुस्ती १५०, श्रेणी व गुणपडताळणी प्रत्येकी १००, गुणपत्रक पडताळणी १५०, ट्रान्सस्क्रिप्ट ५०$, पात्रता व स्थलांतर प्रमाणपत्र प्रत्येकी २०० रुपये असतील. राज्याबाहेरील विद्यार्थ्यांसाठी रेखाकला दुय्यम प्रमाणपत्र व नाव दुरुस्ती ४०० रुपये भरावे लागतील.
