जानेवारीपासून ब्रिटनच्या व्हिसा नियमात बदल

 पुढील वर्षी म्हणजेच  2025 मध्ये ब्रिटनमध्ये शिक्षण घेण्याची योजना (Plan to study in the UK)आखत असलेल्या किंवा नोकरीच्या शोधात असलेल्या भारतीयांसाठी महत्त्वाची बातमी आहे. आता तुम्हाला ब्रिटनला जाण्यासाठी जास्त पैसे खर्च करावे लागतील. याचे कारण नवीन वर्षापासून ब्रिटीश सरकारने (British government) विद्यार्थी आणि कामाच्या व्हिसासाठी मासिक खर्चाची मर्यादा वाढवली (Increased monthly spending limit for visa)आहे. जानेवारी 2025 पासून भारतातून ब्रिटनमध्ये शिकण्यासाठी किंवा नोकरीसाठी जाणाऱ्यांना आता त्यांच्या खात्यात पूर्वीपेक्षा 11 टक्के जास्त रक्कम बचत म्हणून दाखवावी लागेल.

इमिग्रेशनचा गृहनिर्माण आणि अर्थव्यवस्थेवर होणारा परिणाम कमी होईल. या उद्देशाने ब्रिटिश सरकारने हा निर्णय घेतला आहे.  सध्या ब्रिटनमध्ये मोठ्या संख्येने परदेशी शिकत आहेत, तर नोकरी करणाऱ्यांची संख्याही मोठी आहे. ब्रिटनमध्ये एक लाखाहून अधिक भारतीय विद्यार्थी येथील उच्च विद्यापीठांमध्ये शिकत आहेत.आता  ब्रिटिश सरकारच्या वेबसाइटवर विद्यार्थी आणि वर्क व्हिसासाठी कोणत्या अटी पूर्ण कराव्या लागतील यासाठीचे नवीन नियम अपडेट करण्यात आले आहेत.  

येत्या 2 जानेवारीपासून ब्रिटनमध्ये शिकण्यासाठी व्हिसा मागणाऱ्या विद्यार्थ्यांना त्यांच्याकडे राहण्यासाठी पुरेसा पैसा असल्याचे सिद्ध करावे लागणार आहे. लंडनमध्ये शिकण्यासाठी, विद्यार्थ्याच्या खात्यात दरमहा 1,483 पौंड (सुमारे 1.5 लाख रुपये) असणे आवश्यक आहे. लंडनच्या बाहेरील शहरांमध्ये अभ्यास करण्यासाठी, ही रक्कम 1,136 पौंड (सुमारे 1.2 लाख रुपये) आहे.

अशा प्रकारे, लंडनमध्ये एक वर्षाच्या मास्टर्स प्रोग्रामचा अभ्यास करण्यासाठी, विद्यार्थ्याला त्याच्या खात्यात  9 महिन्यांच्या खर्चाइतके पैसे दाखवावे  लागतील, जे एकूण 13,347 पौंड (अंदाजे 14 लाख रुपये) आहे. तर लंडनच्या बाहेरील शहरात मास्टर्स प्रोग्रामसाठी आवश्यक बचत रक्कम  10,224 पौंड  (अंदाजे 11 लाख रुपये) आहे. व्हिसासाठी अर्ज करण्यापूर्वी हे पैसे विद्यार्थ्याच्या  खात्यात किमान २८ दिवस राहिले पाहिजे.

स्किल्ड वर्कर व्हिसासाठी पहिल्यांदा अर्ज करणाऱ्या लोकांना किमान ३८,७०० पौंड (सुमारे ४१ लाख रुपये) वार्षिक उत्पन्न दाखवावे लागेल. यामध्ये निवास आणि घर भाड्याचा समावेश असावा. त्यांना 'होम ऑफिस' ने मान्यता दिलेल्या यूके कंपनीकडून प्रायोजकत्व देखील मिळवावे लागेल. जर कोणत्याही कंपनीने तुम्हाला प्रायोजकत्व दिले  नसेल तर व्हिसासाठी अर्ज करण्यापूर्वी तुम्हाला ही रक्कम तुमच्या खात्यात 28 दिवस दाखवावी लागेल.

पर्यटक, कुटुंब, जोडीदार, मूल आणि विद्यार्थी व्हिसासह अनेक प्रकारच्या व्हिसासाठीचे शुल्क थोडे वाढले आहेत. तथापि, अपंग, काळजीवाहू आणि आरोग्यसेवा कर्मचारी, लष्करी आणि काही विशेष प्रतिभा असलेल्या लोकांना यातून सूट देण्यात आली आहे.